Парис-2024 олимпын наадам амжилттай болж өндөрлөлөө. Энэ удаагийн наадмын үеэр болсон онцлох үйл явдал, тамирчдын талаар товч мэдээллийг хүргэж байна.

МЕДАЛИЙН ТООГООР АНУ ТЭРГҮҮЛЛЭЭ

Парисын олимпоос эхлэн скейтборд, спорт авиралт, серфинг, брейк бүжиг гэсэн дөрвөн төрлийг шинээр нэмсэн.

ОЛИМПЫН НЭЭЛТИЙН ГОЛ БААТАР СЕЛИН ДИОН, ХААЛТЫНХ ТОМ КРУЗ БАЙЛАА

Энэ удаагийн олимпын нээлтийн ёслолд алдарт дуучин Селин Дион оролцсон нь олны талархлыг хүлээлээ. Учир нь ховор төрлийн хүнд өвчнөөр шаналж буй түүнийг хэзээ тайзан дээр эргэн гарах талаар олон нийт хүлээлттэй байсан тул энэ нь цагаа олсон үйл явдал болсон юм. Харин хаалтын ёслолд Холливүүдийн од Том Круз олимпын тугийг барин цэнгэлдэхийн дээврээс буусан нь олныг гайхшируулав. Тэрбээр “Биелэгдэшгүй даалгавар” киноны хэв маягийг шингээсэн уг үзүүлбэрээрээ дараагийн олимпын наадмыг зохион байгуулах Лос Анжелес хотын даргад олимпын тугийг хүлээлгэн өгсөн юм.

ХЯТАДЫН ТАМИРЧИН ОХИНЫ ҮЙЛДЭЛ ОЛНЫ ХАЙРЫГ БУЛААВ

Медаль гардуулах индэр дээрх Хятадын 18 настай гимнастикч Жоу Жакигийн үйлдэл олны хайрыг булаав. Тодруулбал, мөнгөн медаль хүртсэн түүний хажууд зогсох Италийн тамирчид медалиа хазаж зургаа авахуулж буйг хараад гайхсан охин дуурайж буй бичлэг цахим ертөнцөд түгж хүмүүс түүнийг өхөөрдсөн юм.  

АНУ-ЫН ТАМИРЧИН ХОСЫН БАЯРЛАЖ БУЙ АГШИН

Мэдээж ихэнх тамирчид ялалтын баяраа ойр дотнын хүмүүстэйгээ хамгийн түрүүнд хуваалцдаг. Гэхдээ энэ удаагийнх илүү онцгой байв. Учир нь АНУ-ын тамирчин Тара Дэвис-Вудхолл алт авах нь тодорхой болоход үзэгчдийн суудалд нулимстай нүдтэй, хайртай бүсгүйгээ дэмжин хашхирч зогссон түүний нөхөр Хантер Вүүдхолл ямар их баярлаж, эхнэр нь түүн рүү үсрэн чангаар тэврэлдэж буй нь зурагчны дуранд гайхалтай агшин болж буужээ.

Сонирхуулахад Дэвис-Вудхолл Токиогийн олимпод 6 дугаар байрт орсон бол энэ удаад гайхалтай үсрэлт хийж амжилтаа алтан медаль болгож ахиулж чадсан юм.  Харин түүний нөхөр Хантер Вүүдхолл паралимпын тамирчин бөгөөд 2016 оны Риогийн паралимпаас мөнгө болон хүрэл, Токиогийн паралимпаас хүрэл медаль тус тус хүртэж байв. Тэд 2022 онд хуримаа хийсэн билээ.

АВСТРАЛИЙН БҮЖИГЧНИЙ ҮЗҮҮЛБЭР ХҮМҮҮСИЙН ГАЙХШИРАЛ, ИНЭЭДИЙГ ЗЭРЭГ ХҮРГЭВ

Шүүгчдээс нэг ч оноо аваагүй, Австралийн брейк бүжигчин 36 настай Рачаэль Ганны үзүүлбэр олны гайхширлыг төрүүллээ. Тэрбээр бүжигчин төдийгүй, их сургуульд соёл судлалын докторын багш юм. Түүний хөдөлгөөнүүд эв хавгүй, мэргэжлийн гэж дүгнэх боломжгүйг бүжиг сонирхогчид төдийгүй үзэгчид цахим ертөнцөд дүгнэж байлаа.

Тэрбээр бүжигтээ шинэлэг байдлыг харуулахыг зорьж зарим хөдөлгөөнөөрөө Австралийн имж амьтныг дүрслэхийг оролджээ. Австралийн олимпын багийн ахлагч Анна Мирес хэвлэлийн бага хурлын үеэр "Тэр бол манайд байгаа хамгийн шилдэг эмэгтэй брейк бүжигчин" хэмээн тодорхойлсон юм.

ДЭЭД АМЖИЛТ ЭВДСЭН ТАМИРЧИД

Куба улсын тамирчин Мижайн Лопес дараалан таван удаагийн олимпоос алтан медаль хүртсэн анхны тамирчин боллоо. Мөн манай улсын тамирчин Б.Сэр-Од зургаан олимп дараалан оролцож буй анхны хөнгөн атлетикийн тамирчин болж түүхэнд нэрээ мөнхөллөө.

Мөн энэ жилийн наадамд тамирчид олимпын 125 дээд амжилт, дэлхийн 32 дээд амжилтыг тус тус эвджээ

ТЭР ХҮЙСЭЭ СОЛИУЛСАН, СОЛИУЛААГҮЙ...

Парис-2024 олимпын наадмын боксын төрөлд 66 кг-ийн жинд өрсөлдсөн Алжирын тамирчин Иман Хелиф олимпын алтан медальтан болох хүртлээ багагүй хэл амны бай боллоо. Учир нь түүнийг хүйсээ солиулсан эрэгтэй хүн хэмээх шуугиан дэгдэж, олон нийтийг талцуулаад байв. Тэрбээр багаасаа боксоор хичээллэж буй бөгөөд 2019 оны эмэгтэйчүүдийн боксын ДАШТ, 2020 оны Токиогийн олимпод тус тус оролцож байсан юм.

Эмэгтэйчүүдийн тав орчим хувьд нь тестостерон дааврыг ихээр ялгаруулах тохиолдол илэрдэг бөгөөд үүний 70 хувь нь Өндгөвчний олон уйланхайт хамшинжтэй холбоотой байдаг аж. Энэ үед хүний бэлгийн дааврын тэнцвэр алдагдах, арьс батгашиж үрэвсэх, эрэгтэй шинж давамгайлах зэрэг шинж тэмдэг илэрдэг байна.

Хэлиф ялалтынхаа дараа "Би эмэгтэй хүн гэдгээ дэлхий нийтэд хэлмээр байна, цаашдаа ч эмэгтэй хүн хэвээр байх болно. Дэлхийн хүн төрөлхтөн Олимпын зарчмыг баримталж, бүхий л тамирчдыг дээрэлхэлтээс хол, ялгаварлан гадуурхахгүй байхыг уриалж байна" гэжээ.

ДОГЬ ТАМИРЧИД...

Турк улсын тамирчин Юсуф Дикеч Парис-2024 олимпын наадмын хийн гар бууны 10 метрийн холимог багийн төрөлд тусгай хэрэгсэлгүй оролцож мөнгөн медаль хүртсэн  нь олныг гайхшируулав. 51 настай тэрбээр зориулалтын нүдний шил, чихний хамгаалалт бус энгийн нүдний шил, чихний бөглөөтэй тэмцээндээ оролцон мөнгөн медаль хүртжээ.

Тэрбээр ярилцлага өгөхдөө "Бүгд намайг тэмцээний үеэр маш тайван байсан гэж бодсон байх. Гэхдээ дотор минь яг л салхи шуурга шиг байсан" гэжээ. Түүнчлэн Өмнөд Солонгосын буудлагын тамирчин Ким Еэ Жи өөрийн өвөрмөц төрх, биеэ авч явж буй байдлаараа олны анхаарлыг татсан. 31 настай түүний хувьд хийн гар бууны 10 метрийн төрөлд мөнгөн медаль хүртсэн билээ.

АМЬД МАСКОТ БОЛСОН РЕППЕР СНҮҮП ДОГГ

Энэ жилийн наадмын онцгой зочин реппер Снүүп Догг байлаа. Хөгжилтэйгөөр өгүүлбэл олимпын шилдэг үзэгч төрөл гэж байдаг бол түүнд бараг алтан медаль өгөхөөр байсан юм. Тэрбээр наадмын нээлтэд бамбар түүчээлж, хаалтын ёслолд ч ая дуугаа өргөв. Мөн хаана л онцгой тэмцээн, тоглолт болно тэнд үзэгчдийн эгнээнд сууж, зарим үед тэмцээн тайлбарлаж байгаа харагдсан. Түүнийг хүмүүс олимпын наадмын амьд маскот /том чихмэл өмсгөлтэй хүн/ хэмээн хочилжээ.