Монгол Улс 2024 оны 5 дугаар сараас ерөнхий боловсролын I-V ангийн нийт 33 сурах бичгийг бүрэн дижитал, интерактив болгосон гэдгийг Гэр бүл, хөдөлмөр, нийгмийн хамгааллын сайд Л.Энх-Амгалан мэдээллээ.

Мичиганы их сургуулийн мэдээлснээр жил бүр уламжлалт сурах бичгийг хэвлэхэд 30 сая мод огтолдог гэсэн тооцоолол бий.
Цахимжуулсны үр дүнд байгаль орчинд ээлтэй, орон зайнаас үл хамааран хаанаас ч ашиглах боломжтой, тогтмол шинэчлэл хийж, салбарын статистик мэдээллийг ашиглах боломжтой зэрэг олон давуу тал үүссэн.  

Манай улс НҮБ-ын "Хувьсаж буй боловсрол" дээд хэмжээний чуулга уулзалтын хүрээнд “Дижитал суралцахуй ба хувирган өөрчлөлт” сэдвээр тусгайлсан хэлэлцүүлэг зохион байгуулж, энэ чиглэлд боловсролын салбарт хэрэгжүүлэх үүрэг, амлалтыг танилцуулж байснаас дараах үр дүнг гаргажээ.

• Бага ангийн 33 сурах бичгийн агуулга, дасгал, даалгаврыг интерактив хэлбэрт хөрвүүлж, нийтдээ 13,500 орчим дасгал, даалгаврын сантай болсон.
• Сургалтын хөтөлбөрийн хэрэгжилт, үйл явц, үр дүнтэй холбоотой мэдээллийг цахим технологи ашиглан богино хугацаанд цуглуулах, багшийн ажлын ачааллыг бууруулах, арга зүйгээ төлөвлөхөд дэмжлэг үзүүлэх цогц цахим системтэй болсон.
• Боловсролын мэргэжлийн байгууллагын холбогдох хүний нөөц, багш нар цахим арга хэрэгсэл, модуль ашиглан интерактив дасгал, даалгавар боловсруулах программтай болов.
• Хичээлийн хуваарь, сурагчдын ирц, интерактив сурах бичгийн дасгал, даалгаврын гүйцэтгэл, цахим сурах бичгийн ашиглалттай холбоотой их өгөгдлийг сурагч, анги, бүлэг, сургууль, дүүрэг, аймаг, үндэсний түвшинд үүсгэх, дүн шинжилгээ хийх, хянах боломжтой болсон.
• Цахим систем нь сурах бичгийг интерактив хэлбэрт хөрвүүлэх, дасгал даалгаврыг хөгжүүлэх, шинээр зохиох тусгайлсан багаж, хэрэгсэлтэй тул сурах бичиг зохиогч, хөгжүүлэгч нар өөрсдөө интерактив сурах бичиг зохиох боломжийг олгосон байна.