Утааны асуудлаар ерөнхий хяналтын сонсгол зохион байгуулна. Энэ хүрээнд "Эрх зүйн орчин, бодлого, шийдвэрийн хэрэгжилт, санхүүжилт, зарцуулалт, хариуцлага" сэдэвт хэлэлцүүлэг болж байна. (2025.01.29)

Сангийн яамны Төсвийн бодлого, төлөвлөлтийн газрын дарга М.Санжаадорж “Агаар, орчны бохирдолд зарцуулсан төсвийн сүүлийн 15 жилийн тойм” сэдвээр илтгэл хэлэлцүүллээ. Засгийн газраас 2018 оноос эхлэн улсын төсвийн бодлогод агаарын бохирдол гэсэн тусгай арга хэмжээг үүсгэн хөрөнгө төсөвлөх болсон. 

• Агаар, орчны бохирдлыг бууруулах үндэсний хөтөлбөр /2018-2025 он/,
• Засгийн газрын “Хөтөлбөр батлах тухай” 2017 оны 98 дугаар тогтоолын  хүрээнд /2018-2024 он/ улсын төсвөөс нийт 336 тэрбум төгрөг төсөвлөж, үүнээс 276 тэрбум төгрөгийг зарцуулжээ.

Гүйцэтгэл 82 хувьтай байна. Улаанбаатарын Агаарын бохирдлыг бууруулах, байгаль орчныг хамгаалах, нөхөн сэргээх үйл ажиллагааны зардал 243 төгрөгийн санхүүжилт олгосон гэв.

Тусгайлсан хөтөлбөр хэрэгжүүлж эхлэхээс өмнө Засгийн газрын тусгай сангийн тухай хуульд 2010 онд нэмэлт, өөрчлөлт оруулж, Цэвэр агаар санг байгуулсан. 

Энэ хүрээнд жилдээ 5-30 тэрбум хүртэл төгрөгийг зарцуулж ирснийг онцоллоо. Энэ хүрээнд агаар, хөрсний бохирдлыг бууруулах, судалгаа шинжилгээ хийх, авто тээврийн хэрэгслээс ялгарах бохирдлыг бууруулах, Улаанбаатар хотын хэмжээнд сэргээгдэх эрчим хүчний нөөцийн судалгаа дүгнэлт, агаарын бохирдлыг бууруулах, түүнийг ашиглах мастер төлөвлөгөө боловсруулах, цэвэрлэх байгууламжийн технологийн шинэчлэл гэх мэт арга хэмжээ авч хэрэгжүүлж, нийт 119 тэрбум төгрөг зарцуулсныг илтгэлд дурдсан байлаа.

Илтгэгч тус яамнаас агаар, орчны бохирдлыг бууруулах холбоотойгоор чиг үүрэгт нь багтсан төсвийн байгууллагуудын талаар судалгаа хийсэн гэв.

М.Санжаадорж орон нутгийн төсвөөс гадна гадаадын зээл, тусламжийг агаарын бохирдлыг бууруулах арга хэмжээний хүрээнд зарцуулсан байна. Олон улсын байгууллага, донор орнуудын чиг хандлага ногоон эрчим хүч,  ногоон ирээдүй рүү чиглэж,  маш чухал үзүүлэлт болсон гэдгийг онцоллоо.