"Mongolia Mining 2024" олон улсын уул уурхайн үзэсгэлэн хоёр дахь өдрөө Буянт-Ухаа спорт цогцолборт үргэлжилж байна.

Тодруулбал уг үзэсгэлэнд баяжуулалтын шинэ технологи, ухаалаг өрөм, бүтээмж өндөр хүнд даацын машин механизм, цахилгаан тээврийн машин гэх мэт 2025 оноос уул уурхайн хайгуул, олборлолтын үйл ажиллагаанд шинээр нэвтрэх цоо шинэ шинэ технологиудыг танилцуулж байна.

13 дахь удаагийн уул уурхай, ханган нийлүүлэлтийн үзэсгэлэнд нийт 20 гаруй орны 250 орчим аж ахуйн нэгж, байгууллага оролцож, өөрсдийн бүтээгдэхүүн, үйлчилгээгээ танилцуулж байгаа аж.

Монголын уул уурхайн салбарын бизнесийн хамтын ажиллагааны чухал талбар болсон "Mongolia Mining 2024" үзэсгэлэнд эрдэс баялгийн салбарын мэргэжилтнүүд, инженерүүд, уурхайчид, үйлдвэрлэгч, ханган нийлүүлэгчид тал бүрээсээ цугладаг. Энэ өдөр үзэсгэлэнгийн сургалтын танхимд Тэсэлгээний салбарын хууль, эрх зүйн орчны өөрчлөлт, Далд уурхайн аюулгүй ажиллагааны дүрэм, Өрөмдлөгийн ажил үйлчилгээний бүтээмж, ТЭЗҮ боловсруулах хүлээн авах журам зэрэг илтгэл, хэлэлцүүлэг өрнөх юм.

Маргааш буюу 10-ныг хүртэл үргэлжлэх тус үзэсгэлэн хүн бүрд нээлттэй, үнэ төлбөргүй бөгөөд салбарын үйл ажиллагаа, бүтээгдэхүүн үйлчилгээ, шинэ дэвшилтэт техник технологитой танилцан, салбарын мэргэжилтнүүдийн тавих илтгэл, хэлэлцүүлгийг хүлээн авах боломжтой.