УИХ-ын намрын чуулган ирэх сард эхэлнэ. Чуулганы хуралдаанаар ирэх оны улсын төсвийн төсөл, төрөөс мөнгөний бодлогын талаар баримтлах үндсэн чиглэлийг нэн түрүүнд хэлэлцэнэ.

Монголбанк ирэх онд ямар бодлого хэрэгжүүлэхээ эдийн засагчдад танилцуулан хэлэлцүүлэв. Энэ үеэр тус банкны удирдлагууд “Импортын өсөлт бидний санааг зовоож байна. Цар тахлаас хойш импорт өссөөр байна. Ямар барааг бид  гаднаас худалдан авав гээд харахад машин, тоног төхөөрөмж дийлэнх хувийг эзэлжээ. Хүнд машин механизмыг компаниуд хамгийн багадаа гурван жил ашиглана. Мөн эдгээрийг олборлолт, тээвэр гэх мэт үйл ажиллагаанд ашиглах тул эдийн засагт эерэг нөлөөтэй.  Харин суудлын авто машины импорт мөн хурдацтай өссөөр байна. Энэ онд 85 мянган ширхэг машин худалдан авчээ. Оны сүүлээр 100 мянгад хүрнэ. Суудлын машиныг компаниудаас илүүтэй иргэд худалдан авдаг” гэв.

Импортын автомашинд БНХАУ-д үйлдвэрлэсэн, цахилгаан машины эзлэх хувь өссөөр байна.