Хүн бүхний өдөр тутмын хэрэглээ болоод буй нийгмийн сүлжээн дэх хүйсээр ялгаварлан гадуурхах, гутаан доромжлох хандлагатай тэмцэх үүднээс Жендэрийн үндэсний хороо 2020 оны 11-р сарыг “ЖЕНДЕРИЙН МЭДРЭМЖТЭЙ СОШИАЛ ОРЧИН”-г дэмжих сар болгон зарласан билээ.

Тэгвэл жендэрийн хэвшмэл ойлголтыг залруулж, эерэг хандлагыг түгээх зорилготой #ХүндлэлдХүйсХамааралгүй үндэсний аянаас өнгөрсөн сарын туршид олон нийтийн нээлттэй санал асуулга зохион байгуулж, иргэний нийгмийн төлөөллүүдийг дараах чиглэлээр тодруулжээ.

Влог – Positive Mongolians

Инстаграм хөтлөгч – Sexual Education

Подкаст эрхлэгч – Ухаарлын долоо хоног

Жиргээч – Nomingerel Kh

Үзэл бодлын манлайлагч – Zuugii Zoey Boldbaatar

Контент бүтээгч – Билгүүний харандаагаар

Нөлөөлөгчдийг тодруулахдаа эрэгтэй, эмэгтэй хүмүүсийн гэр бүл, нийгэм, эдийн засгийн тэгш үүрэг оролцоог сурталчилдаг, харилцан хүндлэлтэй гэр бүлийн соёлыг дэмждэг байдлыг нь шалгуур үзүүлэлт болгосон. Түүнчлэн жендэрийн мэдрэмж бүхий уран бүтээл, үзэл санаа, үлгэр дууриалал болон контентийн агуулгаар зөв үлгэр дуурайл үзүүлдэг манлайлагчид хэмээн олон нийт санал асуулгаар нэр дэвшүүлсэн юм.

Эрэгтэй, эмэгтэй хүмүүс хүйсээс үл хамааран нийгэм, улс төр, гэр бүл, соёлын бүхий л харилцаанд тэгш оролцож, хөгжлийн үр шимээс тэнцүү хүртэх боломжийг дэмждэг, эрэлхийлдэг, энэхүү боломжийг хязгаарлаж буй жендэрийн хэвшмэл ойлголтуудыг өөрчлөхийг зорьдог иргэний нийгмийн дуу хоолойн төлөөлөл болсон нөлөөлөгчдөдөө амжилт хүсье.