Энэхүү нөхөн сэргээлтийн ажлыг Байгаль орчин, уур амьсгалын өөрчлөлтийн яамны бодлогын хүрээнд “Оюу толгой” компани санхүүжүүлж, Сэлэнгэ аймагт үйл ажиллагаагаа явуулдаг орон нутгийн компаниуд гүйцэтгэсэн юм. Үүнд: “Жинжий майнинг” компани 400 га, “Бугант нандин” компани 200 га талбайд тус тус ажиллаж, эвдэрсэн газрын байгалийн хөрсийг сэргээн унаган төрхөнд нь ойртуулсан байна. Ингэснээр тухайн бүс нутагт биологийн нөхөн сэргээлт хийх нөхцөл бүрдэж, Цагаан зүрийн гол унаган төрхөндөө орох эхлэл тавигдлаа.  

“Оюу толгой” компанийн Байгаль орчны мэргэжилтэн Ж.Баярзаяа,  

“Цагаан зүрийн гол нь ойн болон усны санд багтах, байгалийн өвөрмөц тогтоцтой нутаг. Эвдэрсэн газрыг нөхөн сэргээснээр голын урсгал, хөрсний чанар, ургамлан бүрхэвч сайжирч, биологийн олон янз байдал нэмэгдэх чухал нөхцөл бүрдлээ” хэмээн онцолсон юм.    

Сэлэнгэ аймгийн Байгаль орчны газрын дарга З.Түвшинтөгс,  

“Энд олон жил алтны олборлолт хийгдэж, голын гольдрил өөрчлөгдөж, экосистемийн тэнцвэр алдагдсан байсан. Одоо газрын нөхөн сэргээлт хийгдэж, гүн цүнхээлүүд, өндөр шороон овоолгууд тэгшлэгдэн, голын гольдрил анхны хэлбэртээ орсон байна. Цөөрөм, нуур үүсч, бичил ан амьтан, ургамлын төрөл зүйл дахин сэргэх нөхцөл бүрдлээ” хэмээлээ. 

Цагаан зүрийн гол орчимд орон нутгийн тусгай хамгаалалт тогтоосон бөгөөд цаашид аялал жуулчлал, ан агнуурын бүс болгон хөгжүүлэх бүрэн боломжтой. Мөн орон нутгийн иргэд мод тарих, жимсний аж ахуй эрхлэх замаар амьжиргаагаа дээшлүүлэх боломж нээгдэж байна. 

“Оюу толгой” компани өмнө нь Сэлэнгэ аймгийн Ерөө сумын Ялбагийн хөндийд 400 га талбайг, Дархан-Уул аймгийн Шарын гол суманд 215 га талбайг тус тус нөхөн сэргээсэн. Эдгээр нь мөн хариуцлагагүй уул уурхайн нөлөөгөөр эвдэгдсэн газрууд юм. Бид “100 сая мод өвлүүлэн үлдээе” хөтөлбөрийнхөө хүрээнд 2027 он гэхэд Сэлэнгэ аймагт хариуцлагагүй уул уурхайгаас эвдэрч, орхигдсон бүх талбайд нөхөн сэргээлт хийх зорилт тавин ажиллаж, 2022-2025 онд “Оюу толгой” компани нийт 35.1 сая модыг шууд болон дүйцүүлэх хэлбэрээр тарьж ургуулаад байна.