Ерөнхий сайд Г.Занданшатар 9-р сарын 30-ны өдөр ард түмэндээ хандан мэдэгдэл хийж, Хууль зүй дотоод хэргийн сайдаар УИХ-ын гишүүн Б.Энхбаярыг томилох шийдвэр гаргаснаа танилцуулав. Нүүрсний хулгайтай эрс  шийдэмгий тэмцэхийн тулд энэ томилгоог хийснээ Ерөнхий сайд тодотгон хэлсэн. 

Үндсэн хуулиар олгосон бүрэн эрхийн хүрээнд Засгийн газрын гишүүнийг томилох саналаа Ерөнхий сайд мөн өдөр нь Ерөнхийлөгчид танилцуулсан. Мөн УИХ-д танилцуулахаар 10-р сарын 1-ний өдөр өргөн мэдүүлсэн ч УИХ-ын энэ долоо хоногийн нэгдсэн хуралдаанаар асуудлыг хэлэлцээгүй.

Хэлэлцээгүйн учир нь УИХ-аар хэлэлцэх асуудлыг УИХ-ын даргын дэргэдэх зөвлөлийн хурлаар хэлэлцэн баталсны дараа нэгдсэн чуулганаар хэлэлцэх зохицуулалттай. Засгийн газрын гишүүнийг томилох, чөлөөлөх асуудлыг даргын дэргэдэх зөвлөлийн хурлаар хэлэлцээгүй тул асуудлыг чуулганаар оруулах боломжгүй гэсэн тайлбарыг УИХ-ын Ерөнхий нарийн бичгийн дарга Б.Баасандорж өгсөн.

Мөн тэрбээр, Баасан гарагт /2025.10.03/ болох даргын дэргэдэх зөвлөлийн хурлаар Засгийн газрын гишүүнийг  томилох, чөлөөлөх асуудлыг оруулна гэсэн юм.

Үндсэн хуульд зааснаар Хууль зүй, дотоод хэргийн сайдаар Б.Энхбаярыг томилох асуудлыг УИХ-ын чуулганы нэгдсэн хуралдаанд танилцуулна. Сайдад нэр дэвшигчээс УИХ-ын гишүүд асуулт асууж, хариулт авах эрхтэй ч санал хураалт явуулахгүй. Ерөнхий сайд бүрэн эрхийн хүрээнд томилно.  

Засгийн газрын гишүүнийг УИХ-д танилцуулсны дараа Ерөнхий сайд томилж, УИХ-д тангараг өргөснөөр үүрэгт ажлаа хүлээн авч бүрэн эрх нь хэрэгжиж эхэлнэ. ХЗДХ-ийн сайдад нэр дэвшигч Б.Энхбаярыг УИХ-д танилцуулж, тангараг өргөх хүртэл өнөөгийн сайд Л.Мөнхбаатарын бүрэн эрх хэрэгжиж буй юм.