МАН-ын Бага хурлын VIII хуралдаан 08.00 хүртэл үргэлжилжээ.

Хурлын эхэнд Тооллогын комисс санал хураалтын журмаа баталсан. Нэр дэвшигчдийн авсан санал гуравны хоёрт хүрэхгүй бол хамгийн олон санал авсан хүний нэрийг хоёр дахь шатны санал хураалтад оруулахаар тогтжээ.

Эхний санал хураалтад нэр дэвшигч Д.Амарбаясгалан 58 хувийн, Г.Занданшатар 14.3 хувийн санал авчээ. Тооллогыг машинаар болон гараар хийжээ. Хоёр дахь шатны санал хураалтыг явуулах гэтэл нэр дэвшигч Г.Занданшатар бойкот хийж, өөрийн хүмүүсээ дараагийн шатны санал хураалтад оролцуулахгүйгээр хуралдаанаас явуулсан байна.

Бага хурлын гишүүдийн ирцийг дахин бүртгэхэд 321 гишүүн санал хураалтад оролцож, 85.67 хувийн саналаар Д.Амарбаясгалан ялалт байгуулж, МАН-ын даргаар сонгогдлоо. Хуралдааныг УИХ дахь Монгол Ардын намын бүлгийн дарга, УИХ-ын гишүүн Ж.Бат-Эрдэнэ удирдаж, дэд даргаар Бага хурлын гишүүн Г.Гангамөрөн ажиллажээ.

МАН-ын Их хурлыг арваннэгдүгээр сарын 15-ны өдөр хуралдуулах боллоо.