Мобиком Корпораци ХХК, Үндэсний статистикийн хороо, Харилцаа холбооны зохицуулах хороо хамтран өгөгдөлд тулгуурлан статистик тооцоолол хийх туршилтын төслийг эхлүүлэхээр санамж бичиг байгууллаа. 

Хамтын ажиллагааны хүрээнд өгөгдөл, нарийвчилсан тоон мэдээлэлд суурилан хүн амын дотоод шилжилт хөдөлгөөнийг илүү бодитой судалж, төрийн бодлого боловсруулахад ашиглах боломжийг бүрдүүлэхэд Мобиком хувь нэмрээ оруулж ажиллах юм.

“Мобиком корпораци”-ийн гүйцэтгэх захирал Кожи Курушима:

"Энэ төсөл бол Big Data буюу их өгөгдлийг ашиглах санаачилгын нэг хэсэг. Орчин үед туршлага, таамаглал дээр тулгуурласан шийдвэрээс илүүтэй бодит өгөгдөлд суурилан шийдвэр гаргах нь чухал болсон. Тиймээс гар утасны өгөгдлийг статистикт ашиглах нь зөв, оновчтой шийдвэр гаргахад тус болно. Харилцаа холбооны компаниас технологийн компани болох стратегийнхаа хүрээнд бид цаашид өгөгдөлд суурилсан шинэ үнэ цэнийг зах зээлд бүтээхийг зорино” гэв.

Үндэсний статистикийн хорооны Өгөгдөл судалгаа шинжилгээний хэлтсийн дарга Д.Оюунгэрэл:

“Одоогоор дотоод шилжилт хөдөлгөөнийг Улсын бүртгэлийн ерөнхий газрын болон өрхийн бүртгэлийн мэдээлэлд тулгуурлан гаргадаг. Гэвч шилжилт хөдөлгөөн хийж байгаа иргэд бүртгэлийн газар бүртгүүлэхгүй байх тохиолдол гардаг учир үүрэн холбооны өгөгдөл дээр суурилсан тооцоолол илүү бодитой байж чадна.

Төслийн хүрээнд өгөгдлийг Үндэсний дата төвд нууцлан байршуулж, хувь хүний мэдээллийг хамгаалсан орчинд боловсруулалт хийнэ. Аймаг, сум, хороод хооронд хэрхэн, хэдэн хүн шилжиж буйг тооцоолж, олон улсын аргачлалын дагуу статистик боловсруулах боломжийг туршина. Туршилт амжилттай болбол цаашид зөвхөн шилжилт хөдөлгөөн бус, харилцаа холбооны бусад статистик үзүүлэлтүүдийг ч эдгээр өгөгдөл дээр үндэслэн гаргана” гэлээ.

Харилцаа холбооны зохицуулах хороон санамж бичигт гуравдагч талаар оролцож байна. Хууль журмын дагуу өгөгдлийн нууцлал, аюулгүй байдалд хяналт тавин ажиллах юм. Гар утасны өгөгдлийг статистикийн хэрэглээнд нэвтрүүлснээр бодлогын төвшинд илүү томоохон нөлөө үзүүлнэ.

Цаашлаад олон улсын төвшинд Монгол Улсын үзүүлэлтүүдийг илүү хурдан, нарийвчлалтай гаргах боломж бүрдэнэ гэдгийг Харилцаа холбооны зохицуулах хорооны Судалгаа шинжилгээний хэлтсийн дарга Ж.Оюунгэрэл онцлов.

Санамж бичгийн мэдээллийг Дэлхийн банканд хүргүүлж, төсөлд хамрагдах зөвшөөрөл авсны дараа туршилт албан ёсоор эхлэх аж. Үр дүнг 2025 оны арванхоёрдугаар сард танилцуулахаар төлөвлөжээ.

Санамж бичгийн мэдээллийг Дэлхийн банканд хүргүүлж, төсөлд хамрагдах зөвшөөрөл авсны дараа туршилт албан ёсоор эхлэх аж. Үр дүнг 2025 оны арванхоёрдугаар сард танилцуулахаар төлөвлөжээ.