Япон Улсын Токио хотноо Монгол-Японы Төр, хувийн хэвшлийн XII зөвлөлдөх уулзалт болж Шадар сайд Х.Ганхуяг Япон Улсын Эдийн засаг, аж үйлдвэрийн дэд сайд Кенжи Ямадатай албан уулзжээ.

Уулзалтын эхэнд дэд сайд Кенжи Ямада, 2016 онд Эдийн засгийн түншлэлийн хэлэлцээрийг байгуулсанаас хойш хоёр улсын худалдаа бараа материалын эргэлт даруй 5 дахин өссөнийг дурдав. Мөн “Чингис хаан” олон улсын нисэх буудлын менежментийн хамтын ажиллагаа нь Японы компаниудын Монгол Улсад үйл ажиллагаа явуулах сонирхлыг нэмэгдүүлж буйг онцоллоо.

Япон Улсын Цог Жавхлант Эзэн Хаан Нарухито, Эрхэм Дээд Хатан Масако нарын Монгол Улсад хийсэн түүхэн айлчлал нь хоёр улсын найрсаг харилцааны илрэл болсныг тодотгосон аж.

Зөвлөлдөх уулзалтаар Япон Улс хөнгөлөлттэй зээлийн хөтөлбөрийг сэргээж “Чингис хаан” олон улсын нисэх буудлын өргөтгөлийн төслийг үргэлжлүүлэхэд дэмжлэг үзүүлэхээр болжээ.

Шадар сайд Х.Ганхуяг газрын тосны нөөц хадгалах байгууламжийн бүтээн байгуулалтын төслийг хамтран хэрэгжүүлэх саналтай байгаагаа илэрхийлсэн.

Түүнчлэн Монгол Улсаас хэрэгжүүлж буй 14 мега төсөл, түүний дотор гангийн үйлдвэр, зэс боловсруулах үйлдвэр зэрэг чиглэлээр хамтын ажиллагааг өргөжүүлэх боломжийн талаар танилцуулж, бүсчилсэн хөгжлийн бодлогын хүрээнд Японы туршлага, хамтын ажиллагаа чухал байгааг онцоллоо. 

Дэд сайд Ямада дэд бүтцийн менежмент, үерийн эрсдэл, хүний нөөцийн солилцоо, инновацын салбарт хэрэгжүүлж буй Японы төслүүдийн талаар мэдээлж, хоёр талын бизнесийн хамтын ажиллагааг өргөжүүлэх боломжтойг тэмдэглэв. 

Эх сурвалж: ЭЗХЯ