“Цахим Эрдэнэт-1" хөтөлбөрийг хэрэгжүүлэх мастер төлөвлөгөөний хүрээнд “Смарт Эрдэнэт” интерфейс хийх тендерт “Монгол Контент” ХХК шалгарч, хамтран ажиллах гэрээг үзэглэлээ.

Тус хөтөлбөр 2024 он хүртэл гурван жил үргэлжлэх ба Орхон аймгийн орон нутгийн төсвөөс нийт 4 орчим тэрбум төгрөгийн хөрөнгө оруулалт хийхээр төлөвлөсөн байна. Түүнчлэн Эрдэнэт хотод үйл ажиллагаа явуулдаг томоохон хувийн хэвшил, компаниудыг ухаалаг шилжилтэд уриалах зорилготой уг хөтөлбөрийн хүрээнд иргэн төвтэй гол ажил болгон гар утасны аппликэйшн, мониторингийн систем, веб системүүдийг холбогдох газруудтай интеграц хийн бүтээх юм.

НЭГ ИРГЭНИЙ УХААЛАГ ХЭРЭГЛЭЭНЭЭС НИЙГЭМ, ЦААШИД ХОТ, УЛСААРАА Ч ДАГАЖ ӨӨРЧЛӨГДӨХ БОЛОМЖТОЙ

“Эрдэнэт шинжлэх ухаан, технологийн парк”-ийн захирал, доктор Г.Энхбаяр “Иргэд амьдрахад таатай, бизнес эрхлэх, төлбөр тооцооны систем нь ойлгомжтой хялбар, эрх чөлөөтэй, хараат бус ухаалаг хотыг бий болгох зорилгод үндэслэж “Цахим Эрдэнэт-1" хөтөлбөрийг хэрэгжүүлэх юм. Нэг иргэний ухаалаг хэрэглээнээс нийгэм, цаашид хот, улсаараа ч дагаж өөрчлөгдөх боломжтой. Энэ хөтөлбөр амжилттай үргэлжилбэл ирээдүйд  Монголын харилцаа холбооны салбарт дэвшлийг авчрах сайн талтай.

Орон нутагт иргэдэд ач холбогдолтой үйлчилгээнүүдийг эрэмбэлсэн байдаг. Эрүүл мэнд, нийтийн тээвэр, хог хаягдал зэрэг асуудал үүнд багтана. Иргэд цахимаар бүхнийг амжуулдаг болчихно.

Зарим хүн “Бүх юм цахимжчихсан байхад дахиад юуг цахимжуулах вэ” гэж асуудаг. Гэхдээ нэг цэг дээр олон үйлчилгээг төвлөрүүлж илүү хялбараар, нэгдсэн төлбөрийн систем ашиглах нь бүр их давуу талыг бий болгоно.

Суух автобусоо цахимаар хаана явааг нь харж, эрүүл мэндийн үйлчилгээ авахдаа гар утсаараа цаг аван зөвлөгөө мэдээлэл авах, өөртөө хэрэгтэй үйлчилгээнүүдийг гар утаснаасаа хялбар авах нь олон талт ач холбогдолтой” хэмээсэн юм.

ОРОН НУТАГТ АНХ УДАА “СМАРТ ЭРДЭНЭТ” ХӨТӨЛБӨРИЙГ ХЭРЭГЖҮҮЛЭХЭД ХАМТРАН АЖИЛЛАХ ГОЛ ОРОЛЦОГЧ БОЛСОНДОО БАЯРТАЙ БАЙНА

-“Монгол Контент” ХХК-нийн Гүйцэтгэх захирал Э.Чинзориг:
-Монгол Улсын засгийн газраас дижитал шилжилтийг хийх томоохон алхмуудыг эхлүүлсэн. Сүүлийн хоёр жилийн нөхцөл байдлаас шалтгаалаад улс оронд цахим шилжилтийг хурдасгах шаардлага бий болсон. Цахим шилжилт нь төрөөс иргэдэд үзүүлж буй үйлчилгээг түргэн шуурхай, чирэгдэлгүй болгох, зардлаа хэмнэх зэрэг олон талт ач холбогдолтой юм.   

“Мобиком” групп компанийн хэмжээнд дижитал шилжилтийг 2018 оноос амжилттай эхлүүлэн хэрэгжүүлсэн. Энэ туршлагадаа үндэслэн орон нутагт анх удаа “Смарт Эрдэнэт” хөтөлбөрийг хэрэгжүүлэхэд хамтран ажиллах гол оролцогч болсондоо баяртай байна.

Бид үүнийг маш том хариуцлага хэмээн ойлгож байгаа. Энэ хөтөлбөрийн хэрэгжилт, үр дүнд үндэслэн дараагийн аймаг, хот, сумдад дижитал шилжилт хийхэд дөхөм болно.

ГАР УТСАНД СУУРИЛСАН АППЛИКЭЙШН, СИСТЕМИЙН МОНИТОРИНГ, ЦАХИМ ТӨЛБӨРИЙН ШИЙДЛИЙГ ЦОГЦООР НЬ ТУСГАЖ АЖИЛЛАНА

-“Монгол Контент” ХХК-нийн Мэдээлэл технологийн албаны менежер Г.Гомбо:
-“Смарт Эрдэнэт” хөтөлбөрийн хүрээнд бид Эрдэнэт хотыг цахимжуулах томоохон арга хэмжээг хэрэгжүүлнэ. Гар утасны аппликэйшн, системийн мониторинг, цахим төлбөрийн шийдлийг цогцоор нь тусгаж ажиллах юм.

Хамгийн түрүүнд цахимаар төлбөр төлөх шийдлийг нэвтрүүлнэ. Үүнд “Мобиком” корпорацын “Мобифинанс” ББСБ-ын “MonPay” төлбөрийн шийдлийг ашиглахаар төлөвлөж байна. Үүнтэй уялдуулан хэрэглэгчид таксины үйлчилгээ авах, автобусны картаа цэнэглэх, эрүүл мэнд, боловсролын зэрэг төрийн үйлчилгээг ч цогцоор нь хялбар авах боломж бүрдэнэ. Уг чухал ач холбогдолтой системийн хөгжүүлэлтийг хариуцах үүргийг манай компани хүлээлээ.

“Монгол Контент” ХХК Мьянмар Улсад цахим төлбөрийн системийг хэрэглээнд амжилттай нэвтрүүлсэн туршлагатай. Харин одоо дотоодын хэрэглэгчдийн хандлага, хэрэгцээнд нийцсэн шийдлийг нэвтрүүлэх гэж буйдаа таатай байна.