Монгол цэргийн музейд урлагийн гавьяат зүтгэлтэн, зураач Ч.Батмөнхийн цэрэг эх орны сэдвээр туурвисан “Ялалтын мөрөөр” уран бүтээлийн үзэсгэлэн гарч байна. Өчигдрөөс эхлэн нэг сарын хугацаанд үргэлжлэх уг үзэсгэлэнд уран бүтээлчийн Халх голын дайны тухай судалбар зургууд, цэрэг дайчдын хэрэглэж байсан эд өлгийн зүйлсээс сэдэвлэн туурвисан усан будаг, зураасан зураг, тосон будгаар зурсан уран зургууд багтжээ.

Тухайлбал, “Баянцагааны тулалдаан” хэмээх туурган зураг, Ялалтын мөрөөр, Ялалт авчирсан цуваа, Хувьсгалт Монголын танкийн цуваа Берлинд, Их Хянганыг давсан нь зэрэг дэлгэцийн том хэмжээний уран бүтээлийг дэлгэн сонирхуулж байна.

Энэ үзэсгэлэнд уран бүтээлчийн 70 гаруй зураг, 30 гаруй эд өлгийн зүйлсийг дэлгэсэн бөгөөд цэрэг, эх орны сэдэвтэй уран бүтээлийн дээжээс олон нийт, хүүхэд залуус, цэргийн албан хаагчдын эх оронч, үндэсний үзлийн хүмүүжил төлөвшилд хувь нэмэр оруулах зорилгоор “Ялалтын мөрөөр” үзэсгэлэнгээ гаргасан байна.

Ахмад уран бүтээлч Ч.Батмөнх 1931 онд Дорнод аймгийн Чойбалсан суманд төржээ. Тэрбээр 1947 онд сумынхаа дунд сургуулийг дүүргэж, тэр жилд Чойбалсан суманд Урчуудын эвлэлийн салбар байгуулагдахад анхны дагалдан зураачаар ажилласан байна.
Улмаар 1963-1967 онд УДБС-ийн Дүрслэх урлагийн ангид сурч, “Тулалдааны өмнө” зургаараа диплом хамгаалснаар түүний уран бүтээлд цэрэг, эх орны сэдэвт бүтээл голлох байр эзлэх болжээ. Үүнээс хойш 1970-1978 онд Улаанбаатар хотын Урчуудын эвлэл байгуулагдахад ахлах зураачаар ажилласан бөгөөд Орост болон эх орондоо олон удаа уран бүтээлийн тайлангаа тавьж байжээ.

Өдгөө 80 нас гарсан буурал зураач 1991 оноос хойш Монголын урчуудын эвлэлийн урланд чөлөөт уран бүтээлчээр ажиллаж байна.