Ардчилсан намын VII Их хурал өнөөдөр Улаанбаатар паласт болж байна. АН-ын даргын сонгуулийн дүнгээр хамгийн өндөр оноо цуглуулж, намын даргаар сонгогдсон С.Эрдэнийг Их хурлаараа батламжиллаа. Шинэ даргын нэрийг Улсын Дээд Шүүхэд бүртгүүлэх даалгаврыг Ардчилсан намын Ерөнхий нарийн бичгийн даргад үүрэг болголоо.

Мөн Ардчилсан намын тамгыг шинэ дарга С.Эрдэнэд гардуулан өгсөн бөгөөд тамгыг гардуулах үйл ажиллагаанд нийслэлийн АН-ын дарга Э.Бат-Үүл, АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр нар оролцов.

З.Энхболд: АН-аа дараагийн удирдлагадаа шилжүүлэх түүхэн үйл явдал болж байна

АН-ын дарга асан З.Энхболд шинэ даргад албан тушаалаа шилжүүлэн өгөх үеэр "АН 2016 оны УИХ-ын сонгуульд цөөнх болсон хэдий ч алдаа дутагдалдаа дүгнэлт хийж, намын шинэчлэлийн шинэ эринийг эхлүүлж, шинэчлэгдэж буй АН-аа дараагийн удирдлагадаа шилжүүлэх түүхэн үйл явдал болж байна. Энэ удаагийн Их хурлын зардлыг фракц бүлэглэл, олигархууд, оффшорчдоос авахгүйгээр нийт жирийн гишүүдийнхээ хандиваар бүрдүүлсэн гэдгээ хэлэхэд таатай байна. Нэгдэж, шинэчлэгдэж чаддаг, оффшорчид олигархуудаасаа салж чадсан АН-ын гишүүддээ дахин баяр хүргэж байна. АН-ын гишүүн З.Энхболдын хувьд цаашид намаа дахин эрх баригч нам болж, улс орноо хөгжүүлэх гол улс төрийн хүчин болгохын төлөө бүх хүчээ дайчлан та бүхэнтэй хамтран зүтгэх болно. Намын гишүүдийн олонхийн саналаар сонгогдсон С.Эрдэнэд баяр хүргэж, 2020 оны сонгуульд амжилт гаргахыг ерөөж байна" гэлээ.

С.Эрдэнэ: 2020 оны УИХ-ын сонгуульд ялах болно

Ардчилсан намын VII хурлаар намын даргын тамга тэмдгээ хүлээн авсан шинэ дарга С.Эрдэнэ гишүүддээ хандаж үг хэллээ.

Тэрбээр "АН шинэчлэгдэхийн хэрээр Монгол Улс хөгжинө. Хөгжлийг түүчээлэх үүргээ биелүүлэх болно гэдгийг хариуцлагатайгаар хэлье. Та нарынхаа захиа даалгаврыг биелүүлж, ажиллана. Ахмад, залуу, дунд гурван үеийн төлөөллийн хэлхээсийг хангаж, эмэгтэйчүүдийн жендэрийн тэгш байдлыг хангасан үйл ажиллагаа явуулах болно. Монголчуудын хүсэн хүлээсэн нийгмийг АН авчирч чадна. Бүх шатны сонгуульд ялалт байгуулахын тулд асар их үүрэг хариуцлага хүлээж байна. Хамтаараа Ерөнхийлөгчийн сонгуульд ялалт байгуулах болно. 2020 оны УИХ-ын сонгуульд ялах болно. Би АН-ын 180 мянган гишүүндээ итгэж байна, би Монголын ард түмэнд итгэж байна. Бид хувийн хэвшлийг хүндэтгэдэг нийгмийг бий болгоно."

Түүнчлэн АН-ын дарга асан З.Энхболдод цаашдынх нь ажилд амжилт хүсэж, алд цэнхэр хадаг, мөнгөн аягийг идээний дээжийн хамт гардууллаа. Мөн З.Энхболд, Э.Бат-Үүл, Л.Эрхэмбаяр нарт АН-ын тугийг үүрд хадгалуулахаар дурсгал болгон гардуулан өглөө.

Гэрэл зургийг Б.Бямба-Очир