Боловсрол, шинжлэх ухааны яамнаас Сургуулийн удирдлагын систем, сургалтын цахим платформын талаар дэд сайд Г.Ганбаяр  болон холбогдох нэгжийн дарга нар мэдээлэл өгч байна.

“ХҮҮХЭД ЦАГ ХУГАЦАА, ОРОН ЗАЙГ ҮЛ ХАМААРАН БОЛОВСРОЛЫГ ТЭГШ ХҮРТЭХ БОЛОМЖИЙГ БИЙ БОЛГОНО”

БШУЯ-ны  Дэд сайд Г.Ганбаяр

Бүх шатны боловсролын байгууллагын үйл ажиллагаа хэвийн явж байна. 12.24-нд нэгдүгээр улирал амарна. Энэ хичээлийн жил 3 улирлаар зохион байгуулагдаж байгаа ба ханиад томуутай холбоотойгоор ийнхүү шийдвэрлэсэн.

Боловсролын апп, сайт нь үнэ төлбөргүй, хандахад дата унахгүй давуу талтай. 

Манай салбар дээр цахим шилжилт нэлээн идэвхтэй бэлтгэгдэж байна. esis.edu.mn сайтыг шинээр нэвтрүүлж байгаа ба  үүнд багш, эцэг эхэд хамааралтай дата мэдээлэл, цахим контент, статистик мэдээ, СӨБ, ЕБС, Дээд боловсролын системийг нэгтгэлээ. 

Энэ нь дараах давуу талыг бий болгож байна. 

• Хаана ямар сургууль, цэцэрлэг баригдаж байгаа, хөрөнгө оруулалтын талаарх мэдээллийг харах
• Боловсролын бүх төрлийн лавлагаа, гэрчилгээг цахимаар харах боломжтой. Өөрөөр хэлбэл ажил олгогч тухайн горилогчийн гэрчилгээг шууд харж болно.
• Сурагчийн ирц, даалгавар, хичээлийн хуваарь, хичээл зааж байгаа багш нар, сурах бичгийн мэдээлэл зэргийг авах боломжтой. 
• Багш нар цаасан биш цахим журнал хөтөлж бичиг цаасны ажлыг нь хөнгөвчилнө.

Багш нарыг компьютертэй болгоход 8 орчим тэрбум төгрөг зарцуулах ба төслийг ойрын хугацаанд хэрэгжүүлнэ. Цахим шилжилтийн хамгийн гол зорилго нь сурагч хүүхэд цаг хугацаа, орон зайг үл хамааран боловсролыг тэгш хүртэх боломжийг бий болгож байгаа юм. Мөн гадаадад суралцах хүсэлтэй оюутан залуус уг сайтаас мэдээлэл авах боломжтой. 

Гадаадад байгаа монгол хүүхдүүд, малчны хүүхдүүд, хөгжлийн бэрхшээлтэй хүүхдүүдийн эрх зүйн орчныг нь бүрдүүлэхийг хичээн ажиллаж байна. 

Оффлайн буюу интернетгүй орчинд ажиллуулах боломжтой байх даалгаврыг хатмран ажиллаж байгаа нийт IT компанид өгсөн. Боловсролын апп, сайт нь үнэ төлбөргүй, хандахад дата унахгүй давуу талтай. 

"ҮНДЭСНИЙ 8 КОМПАНИТАЙ ХАМТАРЧ ЦАХИМ ШИЛЖИЛТИЙГ ХИЙЖ БАЙНА"

БШУЯ-ны Бага, дунд боловсролын газрын дарга Т.Ням-Очир:

2020.10.01-2020.10.05-ны хооронд Үндэсний хэмжээний найман компани өөрсдийн хөгжүүлж байгаа бүтээгдэхүүнээ танилцуулж, бид санамж бичиг байгуулан, нийт 90 сургуулийг сонгон авч ажиллаж байна.

Жишээ нь,  И Эс Эм компани ерөнхий боловсролын зарим сургуульд "Их нүүдэл" системийг хөгжүүлж байгаа бол Ай Си Ти групп 15 сургуульд багаа бүрдүүлж сургалт мэдээллээ хийж байна. 

Ай Си Ти групп, И Эс Эм, Мэксим консалтинг, Амжилт дотком, Эй плас интернэйшнл, Гэрэгэ системс, ТомЁ ЭдТек зэрэг найман компани  дараах шаардлагыг хангасан сургалтын удирдлагын системийг 3 сарын хугацаанд 90 сургуульд туршин хэрэгжүүлнэ. Үүнд:

• Багш суралцагч, эцэг эх сургалтын удирдлагын системд нэвтрэх боломжтой
• Цахим орчинд видео болон унших, сонсох агуулгыг ашиглах боломжтой байх
• Онлайн буюу видео чат хэлбэрээр сургалт явуулах боломжтой байх
• Суралцахуйн явцыг үнэлэх, хянах хэсэгтэй байх
• Багшийн бэлдсэн контент буюу агуулга оруулах боломжтой байх
• Дасгал ажил хийх гүйцэтгэх, шалгалт авах боломжтой байх
• Удирдлагын тайлангийн хэсэгтэй байх