Энэ сарын 12-нд дулаан, усны үнийн нэмэгдлийг хойшлуулах үүрэг даалгаврыг Засгийн газраас холбогдох байгууллагуудад өгөв.   

ЗГХЭГ-ын дарга Н.Учрал энэ талаар мэдээлэхдээ  “Засгийн газрын өнөөдрийн хуралдаанаар эдийн засгийн нөхцөл байдлын талаар Сангийн сайдын мэдээллийг сонслоо. Олон улсын худалдааны дайн, Трампын тарифтай холбоотойгоор үүсэж буй нөхцөл байдалтай уялдуулан холбогдох арга хэмжээ авахыг сайд нарт Ерөнхий сайд үүрэг болгосон.

Монгол Улс төрийн байгууламжийн хувьд нэгдмэл улс. Энэ утгаараа 21 аймаг болон нийслэлд ямар нэг төлбөр хураамж нэмэгдүүлэх, хууль дагуулж татвар нэмэхийг Засгийн газрын шийдвэрээр хориглож байна. 

Цаашид УИХ-д өргөн мэдүүлэх хууль, тогтоомжуудыг дагалдуулан татвар, төлбөр, хураамж нэмдгийг зогсоох шийдвэр гаргасан” гэсэн юм.

Инфляц өнгөрсөн нэгдүгээр сарын байдлаар нийслэлд 9.7 хувь, улсын хэмжээнд 9.6 хувь байсан. Үүнд эдийн засгийн индэвхжил, цалингийн өсөлт, үйлчилгээ, түрээсийн үнэ , цахилгааны үнэ өссөн нь гол нөлөөг үзүүлжээ. Монголбанкнаас хийсэн судалгаагаар инфляц ирэх оны гуравдугаар улиралд 12.4 хувьд хүрч өсөхөөр байжээ. Иймд Засгийн газар дулаан, ус гэх мэт үйлчилгээний үнийг өсгөх төлөвлөгөөнөөсөө буцлаа.  

Инфляц яагаад өсдөг вэ?

Эдийн засаг хэт тэлэх, мөнгөний нийлүүлэлт огцом өсөх, төрийн зардал нэмэгдэх, үндэсний үйлдвэрлэлийн бодит хэмжээ буурах, үндэсний мөнгөн тэмдэгтийн ханш сулрах, татвар болон гадаад зээлийн өртөг нэмэгдэх нь үндсэн шалтгаан мөн.