Боловсролын сайд П.Наранбаяр Хүний эрхийн үндэсний комисс /ХЭҮК/-ын дарга Д.Сүнжид, Захиргаа удирдлагын хэлтсийн дарга Д.Ёндонжамц, Хүний эрхийн боловсролын хэлтсийн дарга Х.Цэцгээ нарыг хүлээн авч уулзан, хүний эрхийн боловсролын чиглэлээр хэрэгжүүлэх ажил, арга хэмжээний талаар санал солилцов.

ХЭҮК-оос жил бүр Монгол Улс дахь хүний эрх, эрх чөлөөний байдлын талаарх илтгэлийг боловсруулж УИХ-д танилцуулдаг. Өнгөрсөн оны илтгэлийн хүрээнд сургалтын бүх түвшинд хүний эрхийн боловсролын байдлын судалгааг хийн үр дүн, санал зөвлөмжийг тусгаснаас гадна “Хүний эрхийн боловсролын арга зүй” симпозиумаас яам тус бүрд зориулан зөвлөмж гаргажээ.

Иймд гаргасан зөвлөмжүүдийн дагуух арга хэмжээг төлөвлөн хэрэгжүүлэхийг ХЭҮК-оос зөвлөлөө. Мөн өнгөрсөн онд батлагдсан Боловсролын ерөнхий хуулийн хэрэгжилт, сургалтын хөтөлбөртэй холбоотой өөрчлөлтүүдийн хүрээнд хичээлийн агуулга, сурах бичгийн шинэчлэлийг хийхдээ хүний эрхийн мэдрэмжтэй байхад анхаарах шаардлагатайг онцлов.

Боловсролын сайд П.Наранбаяр дээр дурдсан зөвлөмжүүдтэй сайтар танилцаж, хэрэгжүүлэхийн зэрэгцээ боловсролын салбарт хүний эрх, түүний талаарх мэдлэг мэдээлэл нэн чухал учраас ХЭҮК-той нягт уялдаатай ажиллана гэдгээ илэрхийллээ.