Сонгинохайрхан дүүргийн 192-р цэцэрлэг хүүхдүүдэд муудсан махаар хоол хийж өгч байсныг эцэг, эхчүүд илрүүлэн гомдол гаргажээ. Тус цэцэрлэгийн зарим хүүхдэд гүйлгэх, бөөлжих, халуурах зэрэг шинж тэмдэг илэрсэн бөгөөд ханиад байж болзошгүй гэж арга хэмжээ авсан боловч үр дүнгүй байсан тухай ээжүүд нь ярьж байна.

Нэг ээж цэцэрлэгийн гал тогоонд ороод илт өмхийрсөн махаар хүүхдүүдийн хоол хийж байсныг мэджээ. Цэцэрлэгийн тогооч нь шөнө хүлээж авсан мах дарагдаж, хуучирсан байсныг хүлээн зөвшөөрөөд ээжээс уучлал хүссэн байна. 

192-р цэцэрлэг нь 170 хүүхэдтэй бөгөөд муудсан махны тухай мэдээллийг бусад эцэг, эхчүүдэд дуулгахад гүйлгэх, бөөлжих, халуурах шинж олон хүүхдэд илэрсэн гэжээ.

Хүүхдэд эрүүл ахуйн шаардлага хангахгүй махаар хоол хийж өгч байсан зөрчилд ямар хариуцлага хүлээлгэх талаар БШУ-ы яамны Хоол үйлдвэрлэлийн хэлтсийн дарга Түмэнжаргалаас тодруулахад, 192-р цэцэрлэгийн эцэг, эхчүүдэс гомдол ирсэн. Энэ асуудлаар Боловсролын ерөнхий газраас шалгалт явуулж эхлээд байна гэв.