УИХ-ын чуулганы нэгдсэн хуралдаанаар /2024.08.23/ Засгийн газрын 2024-2028 оны үйл ажиллагааны хөтөлбөрийг хэлэлцэж байна. Энэ үеэр багш нарын төлөөлөл болсон УИХ-ын гишүүн Ц.Мөнхтуяа Боловсролын сайдаас дараах асуулт асуув.  

Тэрбээр, Багш нар эрүүл мэндийн хувьд асуудалтай байна, олноор хорт хавдраар өвчилж байна. Ажлын ачаалал нь хэт их байна. Багш нар тэтгэвэрт гараад удалгүй нас барж байгаа нь үнэн. Тиймээс 50, 55 биш эрт тэтгэвэрт гарах хүсэлтэй багш нар олон байдаг. Энэ асуудлыг яаж шийдэж байна вэ. 

Боловсролын сайд П.Наранбаяр, Багшийн хомсдолтой байгаа энэ үед эрт тэтгэвэрт гаргах тухай ярих боломжгүй. Улсын хэмжээнд 4200 багш дуталдалтай байна. 

Ц.Мөнхтуяа, Эрт тэтгэвэрт гарах нь хүний эрх, эрүүл мэндийн чухал асуудал шүү. Самбарынхаа өмнө ухаан алдаж унаж байгаа багш нар ч байна. Та үүнд анхаарал хандуулах ёстой.  

П.Наранбаяр, Урт насалж, олон шавиараа хүрээлүүлсэн багш нарыг би мэднэ. Яах вэ, гэнэтийн тохиолдол гарч байхыг үгүйсгэхгүй. Багш мэргэжлийн талаар та ийм зүйл ярьж болохгүй гэлээ.