2021 онд телевизийн салбарын компаниудын нийт орлогын 30 хувийг зар сурталчилгааны орлого бүрдүүлж байгааг Харилцаа холбооны зохицуулах хороо мэдээллээ. Дотоодын харилцаа, холбооны салбарын орлогын үзүүлэлт 2021 онд 1.6 их наяд төгрөг болсон нь өмнөх оныхоос 16.9 хувиар өссөн үзүүлэлт болов.

Орлогын нийт үзүүлэлтэд телевизийн салбарын орлого өмнөх оноос 25.1 хувиар өсөж, 69.7 тэрбум төгрөг болсон нь гол жин даржээ. Зар сурталчилгаанаас олсон орлого радиогийн салбарт хамгийн их буюу 52.9 хувийг бүрдүүлж байна.

Ерөнхийдөө харилцаа, холбооны салбар 2021 онд эрчтэй тэлснийг тайлангаас харж болохоор байгаа юм. Тухайлбал: суурин интернэттэй өрхийн тоо 2020 онд нийт өрхийн 50.6 хувийг эзэлж байсан бол 2021 онд 63.9 хувь болж өсжээ.

Монгол Улсын нийт өрхийн тоотой харьцуулбал 87.1 хувь нь телевизийн олон суваг дамжуулах үйлчилгээг хүлээн авч үзэж байгааг тус тайланд дурджээ.

2021 онд харилцаа холбооны салбарт нийт 278.5 тэрбум төгрөг татан төвлөрүүлсэн нь өмнөх оныхоос 14 хувиар өссөн үзүүлэлт болсон байна. Мэдээлэл холбоо, тэр дундаа үүрэн холбооны чиглэлд татсан хөрөнгө оруулалт нийт хөрөнгө оруулалтын 61.8 хувийг бүрдүүлж байгаа аж.

Төсөв төвлөрүүлсэн орлого 300.6 тэрбум төгрөг болж, өмнөх оныхоос 30.9 хувиар өссөнийг онцолж болохоор байна. Яриа буюу үүрэн холбооны салбарын төсөв төвлөрүүлсэн орлого хамгийн их буюу 62 хувийг бүрдүүлж байна.

Г.Хулан