Тогтвортой хөдөө аж ахуй, хүнс, ундааны салбарыг дэмжих шинэ төслийг Европын холбоо эхлүүлжээ. Европын Холбооны СВИЧ-Эйшиа хөтөлбөрийн хүрээнд дөрвөн жил хэрэгжих, 1.76 сая еврогийн санхүүжилттэй “Эдийн засгийн ногоон шилжилт” төсөл нь газар тариаланд суурилсан хүнс, ундааны чиглэлээр үйл ажиллагаа явуулдаг 1500 бичил, жижиг, дунд үйлдвэрлэгч, бизнесийн 30 холбоод болон 750 борлуулагчдыг зах зээлийн зарчимд суурилсан эко тэмдэг нэвтрүүлэх замаар тойрог эдийн засагт шилжихэд нь дэмжлэг үзүүлнэ.

Төслийн нээлтийн үйл ажиллагаатай холбогдуулан “Ногоон яриа”- олон нийтэд нээлттэй үйл ажиллагаа зохион байгуулна. Энэ нь тойрог эдийн засгийг дэмжих, ногоон зохистой дадал, байгальд ээлтэй хэрэглээ, үйлдвэрлэлд шилжихэд хувийн хэвшил, шийдвэр гаргагч, бусад оролцогчдын үүрэг, оролцооны нөлөөллийг харуулахад чиглэжээ. Гурван илтгэгч оролцож, хэлэлцүүлэг өрнүүлэх аж.

Илтгэгчид:

• Европын Холбооноос Монгол Улсад суугаа Онц бөгөөд Бүрэн Эрхт Элчин Сайд Эрхэмсэг Хатагтай Аксель Никэйз;
• Байгалийн Ухааны Доктор Р.Сүнжидмаа;
• ONDO ХХК, Маркетинг хариуцсан гүйцэтгэх Захирал Б.Мандуул;
• “ТИНЦ” ХХК Үүсгэн Байгуулагч Б. Туяа

Энэ үйл ажиллагаа энэ сарын 27-нд 16:00–18:50 цагийн хооронд Шинжлэх ухаан, технологийн их сургуулийн I байрны III давхрын хурлын танхимд болно. Төслийг Пипл ин Нийд (ПИН), Каритас Чех Репаблик (КЧР), Монголын тогтвортой санхүүжилтийн холбоо (ТоС), Хөгжлийн шийдэл ТББ-ууд хамтран хэрэгжүүлж байна.