Нийслэлийн засаг даргын нэгдүгээр орлогч Т.Даваадалай явган хүний замыг шинэчилж буй ажлын явцтай танилцав.   

Геологийн төв лабораторийн уулзвараас Саппоро хүртэлх явган хүний замын тохижилтыг “Бадрах инженеринг” ХХК гүйцэтгэж байна. Тус компани “Үүдэн чулуу” ХХК-ийн үйлдвэрлэсэн чулуу, бордюрыг ашиглаж байна. 

Нийслэлийн засаг даргын нэгдүгээр орлогч Т.Даваадалай "Бид дотоодын үйлдвэрлэлээ дэмжиж, энэ компанийн дөрвөн см зузаан, 60х30 хэмжээтэй хавтанг сонгосон.  Гэхдээ хатуу чулуу тул хагарна. Цементэн бордюр хурдан эмтэрдэг тул насжилт урт гээд чулуун бордюр тавьж байна. Явган хүний замын хуучин, өнгөт хавтангуудыг дүүргийн удирдлагуудад хүлээлгэн өгнө. Тэдгээрийг хаяхгүй, өөр байршилд ашиглана.

НЗДТГ Монголын чулуу үйлдвэрлэгчдийн холбоотой хамтран ажилладаг. Халтирдаггүй чулуу гэж байхгүй, цас ороход бүгд халтирна. Гэхдээ шатаах аргаар барзайлгасан чулууг явган хүний зам дээр тавьж байна. Дор хаяж 20-30 жилийн насжилттай. Иргэд явган замыг шинэчилж байгааг маш их шүүмжилж байна. Их элэгдсэн, хагарсан, эвдэрсэн, энд тэндээ цөмөрчихсөн замыг засаж байна" гэв. 

"Үүдэн чулуу" ХХК-г 2006 онд байгуулжээ. Цэрэндоржийн Энхтайван тус компанийг эзэмшин, удирддаг. Мод, чулуун сийлбэр, барилгын материалын худалдаа, барилгын засвар, оршуулшын үйлчилгээ, автомашинаар ачаа тээвэрлэх ажил үйлчилгээг үзүүлдэг байна.         

Компанийн хаяг - Улаанбаатар, Чингэлтэй, 12-р хороо, 777

Сүхбаатарын талбай орчим гэх мэт 14 байршилд явган хүний шинэ хавтанг тавьж эхэлсэн. 14 компани энэ ажлыг гүйцэтгэж байгаа аж. “Бадрах инженеринг” ХХК-ийн инженер "Явган хүний зам дээр тавих тул элээж барахгүй" гэв.

Гэхдээ иргэд ашиглаж болохуйц байсан замыг хуулан, нийслэлийн төсөвт үрэлгэн хандсанд бухимдаж байна. Хан-Уул дүүргийн 15-р хорооны оршин суугч Б.Э "Манай гэрээс Хан-Уулын И-март руу явдаг замыг хуулж, бөөн шороо босгосон.Тэр зам шинэ биш ч эвдрээгүй. Би тэрэг түрж хүнсээ цуглуулдаг тул сайн мэднэ. Энэ зам дагуу мод тарихыг дүүргийн даргаас олон удаа гуйгаад хэрэгжүүлээгүй. Тэгсэн атлаа зүгээр байсан хавтангуудыг хуулсан.

Төв шуудангийн зүүн талын, "Монгол шуудан" ХК байрладаг, орон сууцны байрны явган зам ч бас зүгээр шахуу л байсан. Би их алхдаг болохоор мэднэ. Энд тэндээ хагарсан бол тэр дор нь засахын оронд бүтнээр нь хуулж байгааг гайхаж байна. Хотын удирдлагууд үүнд хэчнээн төгрөг зарцуулснаа ил тод тайлагнах ёстой" гэв.