Эрүүл мэндийн сайд Ж.Чинбүрэн СЭМҮТ-ийн удирдлагуудтай үйл ажиллагаатай холбоотой санхүүгийн ноцтой зөрчлүүдийн талаар мэдээлэл хийсэн бөгөөд тус төвийн захирлыг ажлаас чөлөөлж, түр орлон гүйцэтгэгч томилсон гэж мэдэгдсэн. Салбарын сайдын мэдэгдэлтэй холбоотой ажлаа хүлээлгэн өгсөн ерөнхий захирал Г.Анхболдоос зарим зүйлийг тодрууллаа. 

-Та СЭМҮТ-ийн захирлаар томилогдож ирснээс хойш эмнэлэгт санхүүгийн ноцтой зөрчлүүд гарч байгааг хэзээ мэдэв. Мэдсэнээс хойш ямар арга хэмжээ авсан бэ?
-Би 2024 оны 9-р сард томилогдсон. Томилогдсоноос хойш сар гаруйн дараа буюу 10-р сард СЭМҮТ-ийн Хэвтэн эмчлүүлэх клиник, тасгийн орны эргэлт, төлбөртэй тусламж үйлчилгээнд хяналт шалгалт хийх тушаал гаргаж, удирдамж боловсруулсан. Тухайн үед кассаар бэлэн мөнгө авдаг зэрэг зөрчлүүд илэрсэн учир хяналт шалгалт хийхээр болсон.

Эхний ээлжинд бид эмнэлгийн нэг жилийн үйл ажиллагаа буюу 2023 оны 10-р сараас 2024 оны 10-р сар хүртэлх хугацааны төлбөрт тусламж үйлчилгээнд хяналт шалгалт хийхэд 156 сая төгрөгийн зөрчил урьдчилсан байдлаар илэрсэн. Зөрчил илэрсэн тул шалгалтын үр дүнг нэгтгээд 11-р сард нь ЭМЯ-нд мэдэгдэж, Авлигатай тэмцэх газарт хандаж шалгуулахаар хүсэлт өгсөн. АТГ болон ЭМЯ-наас хянаж үзээд, уг хэргийг ЦЕГ-ын Эдийн засгийн гэмт хэрэгтэй тэмцэх газар шалгаж эхэлсэн. 2025 оны 1-р сард манай эмнэлэгт мөн дахин шалгалт хийсэн байдаг. Үүнээс хойш энэ асуудал захирлын эрх мэдлээс хэтэрч, хууль хяналтын байгууллагад шилжсэн юм.

Дотоод хяналт шалгалтыг бид нэг жилийн үйл ажиллагаанд хийсэн бол хууль хяналтын байгууллага сүүлийн 4-5 жилийн үйл ажиллагааг шалгаж үзээд, сайдын мэдэгдсэн зөрчлүүд илэрсэн байх. Тэгэхээр нийт хэдэн төгрөгийн зөрчил илэрсэн болон ямар албаны хүмүүс холбогдсоныг шалгаж, нотлоод Прокурорт шилжүүлнэ гэсэн ойлголттой байна. 

-Санхүүгийн зөрчил гаргасан, энэ асуудалд холбогдсон хүмүүс одоо ажиллаж байна уу?
-Одоогоор хууль хяналтын байгууллагууд шалгалтын ажиллагаа явуулж байна. Гэм буруутай нь шүүхээр нотлогдоогүй тул ямар албан тушаалтнууд оролцсон зэрэг мэдээлэл өгөхөд эрт байна. Хяналт, шалгалтын дараа тодорхой хүмүүст нь хариуцлага тооцох байх. Энэ асуудалд холбогдсон хүмүүсээс зарим нь ажлаас гарсан. 

-Танаас өмнө СЭМҮТ-ийн захирлууд ойр ойрхон хугацаанд солигдсон шиг санаж байна?
-Намайг ирэхийн өмнө хоёр жил орчим хугацаанд В.Баярмаа захирал ажиллаж байсан.

-Эмнэлгийн хэвийн үйл ажиллагаа доголдсон мэтээр Эрүүл мэндийн сайд мэдэгдсэн. Ямар зөрчил, доголдлууд байна вэ?
-СЭМҮТ-д олон жил шийдэгдэхгүй явж ирсэн, тулгамдсан маш олон асуудал байдаг. Барилга байшин хэт хуучирсан, дулааны төвийн шугам сүлжээнд холбогдоогүй. Эмнэлэг байтлаа асрамжийн газар шиг байнга амьдардаг эмчлүүлэгчид байдаг. 2-36 эмнэлэгт хэвтэж байгаа, ар гэрийнхэн гэж байдаггүй сэтгэцийн архаг өвчтэй 246 хүн байна. Энэ хүмүүстэй холбоотой хүний эрхийн зөрчил, группийн мөнгөний асуудал гэх мэт олон асуудал бий. Ажлаа авснаас хойших нэг жилийн хугацаанд энэ асуудлуудлыг эхнээс засахыг хичээсэн. Нэг тасгийг орчин үеийн стандартад нийцүүлэн засварласан.