Агаарын бохирдлыг бууруулах Үндэсний хорооны Ажлын албаны дарга С.Даваасүрэн өнөөдөр /2025.09.05/ БНСУ-ын “Dasan 120” сангийн тэргүүн Ли Ли Жэй, “TASSE Mongolia” компанийн Ерөнхий захирал И Ён Сан, “Улаанбаатар смарт карт” ХХК-ийн Ерөнхий захирал Шин Дун Ү нарыг хүлээн авч уулзан, Улаанбаатар хотын агаарын бохирдлыг бууруулах боломж, БНСУ-ын туршлагын талаар санал солилцов.

Ажлын албаны дарга С.Даваасүрэн 2025-2026 оны халаалтын улиралд нийслэлийн гэр хорооллын айл өрхөд хагас коксон түлш нийлүүлэхээс гадна аж ахуйн нэгжүүд халаалтын зуухаа шинэчилж, хийн түлшинд шилжүүлж байна. Ингэснээр Улаанбаатар хотын агаарын бохирдол өмнөх оны түвшнээс 30 орчим хувиар буурах тооцооллыг гарган ажиллаж байгаагаа онцоллоо.

БНСУ-ын TASSE компани нь Баянзүрх дүүргийн 37 дугаар хорооны нэг айлд 2200 в/цаг хүчин чадалтай, хоёр талаараа цэнэг авдаг нарны хавтан, эрчим хүч хуримтлуулагч суурилуулж, янданг нь буулгасан байна. Нарны хавтан нь 25 жилийн баталгаатай, элсэн шуурга, жижиг чулуунд гэмтэл үүсэхгүй давуу талтай бол баттерей нь 4-5 жил ажиллах боломжтой аж.

Эх сурвалж: Агаарын бохирдлыг бууруулах үндэсний хороо