-Владивосток хотоос мэдээлж байна-

Дорнын эдийн засгийн чуулган хоёр дахь өдрөө үргэлжилж байна. Энэ жилийн чуулганы гурван гол зочны нэг нь Ерөнхий сайд Г.Занданшатар. Тэрээр өнөөдөр ОХУ-ын Владивосток хотод хүрэлцэн ирлээ. Түүнтэй хамт манай улсаас 55 хүн энэ жилийн хуралд оролцохоор иржээ.

Лаосын Ерөнхий сайд, БНХАУ-ын Коммунист намын Улс төрийн товчооны гишүүн мөн энэ жилийн хүндэт зочдод тооцогдож байна. 

Ерөнхий сайд Г.Занданшатарыг Монгол Улсаас ОХУ-д суугаа Онц бөгөөд бүрэн эрхт элчин сайд Ө.Энхтүвшин угтав. Төлөөлөгчдийн бүрэлдэхүүнд Шадар сайд С.Амарсайхан, УИХ дахь МАН-ын бүлгийн дарга Ж.Бат-Эрдэнэ, УИХ-ын Хууль зүйн байнгын хорооны дарга Д.Цогтбаатар багтсан. Мөн Сангийн сайд Б.Жавхлан, Зам, тээврийн сайд Б.Дэлгэрсайхан, Аж үйлдвэр, эрдэс баялгийн сайд Г.Дамдинням, Эрчим хүчний сайд Б.Чойжилсүрэн нар Владивосток хотод иржээ.

Ерөнхий сайд өнөөдөр Алс Дорнодын гудамжинд зочлов. Энд Буриад, Якут, Еврейчүүд өөрсдийн соёлыг танилцуулсан урлагийн үзүүлбэр үзүүлж, үзэсгэлэн худалдаа нээжээ.

Ерөнхий сайд Г.Занданшатар өнөө орой орон нутгийн цагаар 20.00 цагт Ерөнхийлөгч Владимир Путинд бараалхаж, маргааш Дорнын эдийн засгийн чуулга уулзалтын өргөтгөсөн хуралдаанд оролцоно. Мөн "Газпром" нийтийн хувьцаат нийгэмлэгийн УЗ-ийн дарга А.Б.Миллертэй уулзана. Уулзалтын дараа талууд санамж бичигт гарын үсэг зурах юм.

Улаанбаатарт байгалийн хий нэвтрүүлэх ажлыг "Газпром" хэрэгжүүлэх болжээ.