Австрали, Монгол, Герман гурван улсын хамтын бүтээл,  Австралийн найруулагч Габриелл Брэдигийн “The Wolves Always Come at Night” (Чоно үүр шөнөөр ирдэг) кино  “Оскар”-ын шагнал гардуулах ёслолын “Шилдэг олон улсын уран сайхны кино” төрөлд Австрали улсын албан ёсны нэр дэвшигчээр сонгогджээ.

​Жил бүр улс орон бүрээс зөвхөн нэг бүтээлийг энэ төрөлд нэр дэвшүүлэх журамтай.  Энэ удаад Австралийн сонгон шалгаруулалтад өрсөлдсөн 16 бүтээлээс тус кино шалгарсан байна.

Уран бүтээл нь  Баянхонгор аймгийн Бууцагаан сумын харьяат Д.Даваасүрэн, Д.Отгонзаяа нарын гэр бүлийн бодит түүхээр дамжуулан уур амьсгалын өөрчлөлт, сөрөн нүүдэллэсэн Монгол малчин өрх, түүнээс улбаатай үнэт зүйлсийн тухай өгүүлдэг аж.

Киног ирэх аравдугаар сарын 15-наас Univision болон VOO сувгаар олон нийтэд хүргэхээр болжээ.