Гэр бүл, хөдөлмөр, нийгмийн хамгааллын салбарын 2026 оны төсвийн төсөлд олон нийтийн санал авах хэлэлцүүлэг эхэллээ. 

2024 онд 3.2 их наяд төгрөг буюу улсын төсвийн 73.6 хувийг нийгмийн халамжид зарцуулсан  байна. Үүнээс 1.5 их наяд төгрөг нь хүүхдийн мөнгө. 530 тэрбум төгрөгийн хагас, бүтэн өнчин хүүхдийн тэтгэмжид зарцуулсан гэж тус яамнаас танилцуулав.

Төсвийн тогтвортой байдлын зөвлөлийн гишүүн Л.Гангэрэл, 2026 оны төсөвт тэтгэврийн хэмжээг 10.3 хувиар нэмнэ гэж танилцууллаа. Энэ юу л бол. Улс орны эдийн засгийн байдал хүндрэлтэй, 2025 оны 7-р сарын сарын байдлаар төсвийн алдагдал 3.3 их наяд төгрөг хүрээд байна. Өнгөрсөн жил цалин, тэтгэврийн хэмжээг 6 хувиар нэмсэн. Эдийн засгийн бодит байдлаас давсан төсөв баталж, иргэдэд хүлээлт үүсгэх вий. Энэ талаар Сангийн яамтайгаа зөвлөлдвөл ямар вэ гэв.

НДЕГ-ын дарга Б.Батжаргал, Цалин тэтгэврийг инфляцтай уялдуулан нэмэх эрх зүйн зохицуулалт хэрэгжиж байна. Өнгөрсөн жил цалин, тэтгэврийг 6 хувиар нэмсэн ч инфляци 7.3 хувь байв. Энэ бодлого, зохицуулалтын хүрээнд 2026 оны төсөвт инфляци 9.6 хувь, үүн дээр өмнөх оны нэмэгдлийн зөрүү 1.3 хувийн оруулж, тэтгэврийг нийт 10.3 хувиар нэмэх төсвийг төсөлд тусгаад байна гэж хариулав.

Хэлэлцүүлэгт оролцсон иргэд, ТББ-ын төлөөллүүд өндөр орлоготой өрхийн хүүхдэд тэтгэмж олгохын оронд халамж шаардлагатай хүүхдийн мөнгийг нэмбэл ямар вэ гэсэн санал хэлж байв.