Гашуунсухайт-Ганцмод боомтын хүчин чадлыг нэмэгдүүлэх Засгийн газар хоорондын хэлэлцээрийг соёрхон батлах тухай хуулийн төслийг өргөн барилаа. Үүнтэй холбоотойгоор Ц.Туваан, Б.Дэлгэрсайхан, Л.Гантөмөр, Т.Доржханд сайд нар мэдээлэл өгөв. 

Аж үйлдвэр, эрдэс баялгийн сайд Ц.Туваан "Олон жил гацсан Гашуунсухайт-Ганцмод боомтын хил холболтын асуудлыг Засгийн газар хоорондын хэлэлцээрээр шийдвэрлэх арга замыг сонгож гэрээ байгуулсан. Өнөөдрийн мөрдөж буй хуулийн дагуу олон улсын хэлэлцээрийг УИХ-аар соёрхон батлуулдаг. Энэ гэрээг дагаад 

• Төмөр замын хил холболт,
• Нүүрс худалдах, худалдан авах
• Уурхайн хүчин чадал нэмэгдүүлэх гэсэн гурван үндсэн гэрээ мөн хийгдэнэ. 

Сүүлийн үед дэлхийн зах зээлд гарч буй тарифын нөлөөгөөр олон улсын худалдаанд асуудал үүсэж байна. Ган, нүүрсний үнэ унаж буй энэ үед энэ гэрээ маш ач холбогдолтой. Учир нь өмнө борлуулж байсан нүүрс дээр нэмэлтээр 5 сая тонн нүүрс борлуулах гэрээг хийнэ. Ингэснээр 400 орчим сая ам.долларыг нэмж төвлөрүүлэх боломж бүрдэнэ" гэв. 

Шадар сайд Т.Доржханд "Дэлхий даяар тарифын хязгаарлалтад орж, улс орнууд эдийн засгаа хумисан ийм нөхцөлд байна. Энэ тохиолдолд жижиг нээлттэй эдийн засгууд хохирдог ба үүний нэг нь Монгол Улс. Бид экспортлогч улс. Энэ үед экспортын бараа бүтээгдэхүүнээ нэмэгдүүлэх шаардлагатай. Энэ гэрээ яаралтай хийх шаардлагатай, улсын эдийн засгийн хувьд түүхэн ач холбогдолтой" гэдгийг онцоллоо.