Монполимет ХХК “Тогтвортой үйлдвэрлэлийн менежмент хэрэгжүүлэгч - Green Preneur” аж ахуйн нэгжээр шалгарлаа. Монгол Улсын оны онцлох аж ахуйн нэгжийг шалгаруулдаг "Entrepreneur 2024" ёслол хүндэтгэлийн арга хэмжээнээс манай байгууллага 23 дахь жилдээ энэхүү шагналыг хүртэж байна.   

Компанийн сайн засаглал, хүний нөөцийн зөв бодлого, олон улсын стандартыг хангасан, техник технологийн шинэлэг дэвшилтэд суурилсан бүтээгдэхүүн, үйлчилгээг нэвтрүүлсэн байдал, тухайн салбарын зах зээлд эзлэх байр суурь болон улсын төсөвт төвлөрүүлсэн татварын хэмжээ, нийгмийн хариуцлага болоод тогтвортой хөгжилд оруулсан хувь нэмрийг нь харгалзан үзэж оны онцлох аж ахуй нэгжүүдийг тодруулдаг уламжлалтай. 

МҮХАҮТ-аас 27 дахь жилдээ зохион байгуулж буй тус арга хэмжээнээс Монполимет групп ийнхүү 23 дахь удаагаа энэхүү шагналыг хүртэж байгаа юм. Манай хамт олон анх байгуулагдсан цагаас л эх дэлхийгээ хайрлах, байгаль орчноо хамгаалах, байгаль орчин, нөхөн сэргээлтийн бодлогыг эн тэргүүнд тавьж, тогтвортой, ногоон хөгжлийг бүтээхийг зорьж түүндээ ч хүрч шинэ техник технологи, инновацыг нэвтрүүлж, хариуцлагатай уул уурхайг төлөвшүүлэн, байгаль орчны нөхөн сэргээлтийн жишгийг салбартаа тогтоосон билээ.

Мөн Монгол Улсад орчин үеийн техник технологи бүхий байгальд ээлтэй таван үйлдвэрийг барьж байгуулан, 1000 гаруй хүнийг байнгын ажлын байраар хангаж үндэсний бүтээн байгуулалт, эдийн засагт томоохон хувь нэмэр оруулж байна.  

Монполимет ХХК-ийн гүйцэтгэх захирал Б.Дэлгэр “Манай компанийн хувьд 2024 онд төр засгийн байгууллагын хууль бус шийдвэрээр “Тосон үйлдвэр”-ээ хаалгаж, техник тоног төхөөрөмжүүдээ битүүмжлүүлэн 4 сарын хугацаанд үйл ажиллагаагаа явуулж чадаагүй. Уул уурхайн үйлдвэрлэлээ явуулж чадаагүй ч байгаль орчин нөхөн сэргээлтийн ажлаа тасалдуулахгүйн тулд өөрсдийн хүчээр гар техникүүдээ ашиглан хийсэн.

Олон саад бэрхшээлтэй тулгарсан ч ажлын байраа хадгалж үйл ажиллагаагаа тогтвортой явуулж байна. Ирж буй 2025 он үндэсний үйлдвэрлэгч, үндэсний хөрөнгө оруулагч компаниудад илүү ээлтэй жил байгаасай. Төр засгийн зүгээс үндэсний үйлдвэрлэгчид үйл ажиллагаагаа явуулах эрх зүйн таатай орчныг бүрдүүлж, хуулиа алагчлалгүй хэрэгжүүлээсэй гэж хүсэх байна” гэж ярилаа. 

Монполимет группийн Монцемент үйлдвэр нь дэлхийн цөөн оронд ашигладаг байгальд ээлтэй технологи болох үйлдвэрээс гарсан халуун хийг эрчим хүч болгож үйлдвэрлэдэг WHR системийг ашигладаг. Тус үйлдвэр 2016 оноос өнөөг хүртэлх хугацаанд 100 сая кв.цаг эрчим хүчийг үйлдвэрлэсэн бөгөөд энэхүү технологийг Монгол Улсад нэвтрүүлсэн ганц компани юм. 

Энэ цаг хугацаанд дэлхий нийтээр анхаарч буй тогтвортой хөгжил, байгаль орчноо хайрлан хамгаалах, байгальд ээлтэй амьдрах, бүтээн байгуулах зэрэг нь Монполимет группийн үүсгэн байгуулагчдын үндсэн философи байсаар ирсэн гэдгийг онцолж байлаа.