#CS2 ESL Challenger League Season 48: Asia тэмцээний playoffs-т ATOX Esports баг хоёр дасгалжуулагчаа тоглуулж IHC Esports-ыг хожлоо.

ESL-ээс зохиодог CS2-ын хамгийн том лигийн тэмцээн "ESL Pro League S21"-ийн эрх олгох "ESL Challenger League Season 48: Asia" тэмцээний playoffs үргэлжилж байна.

40 мянган ам.долларын шагналын сантай тэмцээний дээд хүснэгтийн шөвгийн наймд Монголын гурван баг тоглосноос "ATOX Esports" хагас шигшээд шалгарч бусад хоёр нь хасагдах шат руу унав.

Мэргэн бууч Нямдоржийн "ANNIHILATION" Түвшинтөгсийг сэлгээнд суулгаж, багийн ахлагч Батболдын "dobu" Ган-Эрдэнийг "Alter Ego" баг руу зээлээр явуулсан ATOX Esports ESL-ийн дүрмийн дагуу шинээр тоглогч авах боломжгүй болсон тул багийн дасгалжуулагч Гансүхийн "flyNN" Төгөлдөр, туслах дасгалжуулагч Баасантогтохын "masti" Ана-Эрдэнэ нарын хамт тоглож байна.

Тэд өчигдөр нутаг нэгт "IHC Esports" багийг 2-0 (Dust II 13-10, Anubis 13-10) харьцаагаар хожиж хагас шигшээд шалгарсан. Хагас шигшээгийн тоглолт өнөөдөр 20:00 цагаас Хятадын "Lynn Vision Gaming" багийн эсрэг болно.

• ESL Challenger League-ын playoffs өнөөдөр эхэлнэ
• Монгол залуус Virtus.pro-д хожигдож IEM Rio 2024-өөс хасагдлаа
• The MongolZ Туркүүдээс даагаа нэхэж гэрт нь буцаалаа

IHC Esports баг хожигдсоноор хасагдах шат руу унасан бөгөөд өнөөдөр 20:00 цагаас Оросын "GR Gaming" багтай тоглоно.

Нөгөө талд бас нэгэн монгол баг "The Huns Esports" Хятадын "Bromo" багт 1-2 (Ancient 14-16, Inferno 13-7, Mirage 2-13) харьцаагаар хожигдож хасагдах шат руу унасан бөгөөд өнөөдөр 20:00 цагаас Оросын "SayGGTeam"-тэй тоглохоор болов.

Мөн хоёр тоглогчоо хасаад байсан The Huns баг IHC Esports-ийн "wonderzce", "Chinggis Warriors" багийн Энхбатын "xerolte" Мөнхтогтох нарыг зээлээр тоглуулж байна.