Өмнөд Солонгосын хамгийн өндөр орлоготой эрэгтэй жүжигчдийн нэгт багтдаг Ким Су Хёныг насанд хүрээгүй хүнтэй үерхсэн гэх мэдээлэл энэ сарын эхээр цахим сүлжээнд цацагдсан.

Үүнтэй холбоотой зураг, зарим баримтууд ч мөн цахим сүлжээнд тарсан юм. Энэ мэдээллийг жүжигчин залуугийн агентлаг өмнө нь няцааж байсан.

• Жүжигчин Ким Су Хёныг насанд хүрээгүй хүнтэй үерхсэн гэх мэдээллийг агентлаг нь няцаав

Цахим сүлжээнд гарсан мэдээллээс хойш Ким Су Хёнтой хамтран ажилладаг зарим брэндүүд гэрээгээ цуцалж эхэлсэн юм.

Тэгвэл энэ хугацаанд уг асуудлаар нэг ч үг дуугараагүй байсан жүжигчин залуу анх удаа ам нээж, хэвлэлийн хурал хийлээ.

Ингэхдээ тэрбээр нас барсан жүжигчин Ким Сэ Ронтой үерхэж байсан ч насанд хүрээгүй байхад нь харилцаа тогтоогоогүй гэдгээ мэдэгдэв. 

Тэрбээр "Талийгаач бид хоёр дөрвөн жилийн өмнө үерхэж байсан. "Queen of Tears" кино цацагдах гэж байсан үед цуурхал гарсан учраас үүнийг үгүйсгэсэн. Тиймээс ч хүмүүс намайг яагаад шүүмжилж байгааг ойлгож байна. 

Олон хүнд хүндрэл учруулсандаа уучлалт хүсье. Талийгаачийг амар тайван нойрсуулж чадахгүй байгаадаа гэмшиж байна" гэжээ.

Түүний хувьд худал мэдээлэлтэй холбоотойгоор сэтгэл зүйн дарамтад орсон талаар агентлагаас нь мэдээлж байсан. Өнөөдрийн хэвлэлийн хурлын үеэр жүжигчин залуу уйлсан юм.

Жүжигчин залуугийн өмгөөлөгч болон агентлаг нь дээрх мэдээллийг анх олон нийтэд ил болгосон Youtube суваг эзэмшигчдийг нэр хүнд гутаасан хэргээр шүүхэд өгөөд байгаа аж. 

Эх сурвалж: Yonhap