Өнгөрч буй долоо хоногт болсон зарим үйл явдлаас онцлон хүргэж байна.

УТААНЫ СОНСГОЛ, УГААРЫН ХЭРЭГ...

2025 оны нэгдүгээр сарын 23-нд БГД-ийн 22 дугаар хороонд зургаан хүн гэртээ угаартаж амиа алдсан болох нь урьдчилсан шүүх шинжилгээний дүгнэлтээр батлагдсан. Улмаар тус гэр бүлийн гишүүн, том хүү Хилийн цэргийн 0184-р ангийн байлдагч О.Одбаяр мэдээлэл хийсэн юм.

Тэрбээр ээж, ах, дүү нараа алдсандаа гүнээ харамсаж буйгаа илэрхийлээд хэргийг үнэн мөнөөр шийдвэрлэхийг хууль хяналтын байгууллагынхнаас хүссэн юм. Түүний мэдээлэл олон нийтийн анхаарлыг татаад зогсохгүй бухимдлыг төрүүлэв. Учир нь "Утааны" сонсголд мэдээлснээр сүүлийн 8 жилд угаартаж амиа алдсан хүний тоо 2 дахин нэмэгдэж 779 хүн амиа алдсан гэв. Хариуцлага хүлээх эзэнгүй, цаашид ч иргэд угаартаж үхэх нь эрх баригчдад энгийн мэт болоод буй нөхцөл байдалд иргэд бухимдаж байв. Түүнчлэн дарин дээр давс гэлтэй хохирогчдыг "архичин, хулгайч, өрх толгойлсон, сануулаад байхад угаартсан тэдний буруу" мэт агуулгатай мэдээлэл цахим орчинд тарав.

Улмаар ЦЕГ-аас хариуцлага алдсанаа хүлээн зөвшөөрч, салбарын сайд мэдэгдэл хийв. ХЗДХ-ийн сайд О.Алтангэрэл "..Иргэдийн хувийн эмзэг мэдээллийг агуулсан, хүн харахад цагдаагийн илтгэх хуудас хэлбэрээр бичигдсэн мэдээлэл 21:00 цаг орчимд цацагдсан. Хэрэв хувь хүний нууцыг задруулсан бол 5 хүртэлх жилээр хорих ялтай, хүндрүүлэх нөхцөлтэй байдаг. Энэ мэдээллийг албан шугамаар олж аваад цацсан бол гэмт хэрэг. Энэ бол зөвхөн нэг алба хаагчийн алдаа биш, цаашлаад ЦЕГ-ын удирдлагуудын түвшинд хариуцлага тооцно. гэхдээ энэ мэдээлэлд дурдсан зарим нь үнэнтэй нийцэхгүй ташаа мэдээлэл байсан. Өөрөөр хэлбэл нэг хэсэг нь цагдаад байхгүй мэдээлэл байсан ч, мөн цагдаад хадгалагдаж байсан ч мэдээлэл байна. Тэгэхээр зориудаар ташаа мэдээлэл түгээжээ. Хэн үүнийг хийв, цагдаагийн байгууллага илрүүлэхээр ажиллаж байна.." гэв.

ЗАСГИЙН ГАЗАР ОГЦРОХЫГ ШААРДАЖ, ГАРЫН ҮСЭГ ЦУГЛУУЛАВ

Харин сөрөг хүчнийхэн Засгийн газрыг огцруулах санал боловсруулж, гарын үсэг цуглуулж эхлэв. Тодруулбал, УИХ-ын гишүүн Ч.Лодойсамбуу өөрийн сошиал хуудаст "Энэ мэдээг сонсоод эмгэнэх биш нам дарах гэж оролдож байгаа нь л манай Ерөнхий сайдын үнэн нүүр царай. Заавал бичиг сачиг өргүүлж, кноп тоолж, тоолуулж иргэдээ талцуулж бослого тэмцэл хутга шөвөг бололгүй хүн ёсоор, улсын Ерөнхий сайдын хувьд эс үйлдлийнх нь золиос болж зуурдаар тэнгэрт хальсан тэр олон хүний араас эмгэнэл илэрхийлээд өөрөө огцорч болохгүй юу? Бид тийм байхыг шаардах эрхгүй юу?..." хэмээв. Тэрбээр удалгүй Ерөнхий сайдыг огцруулах тухай саналыг УИХ-ын дарга Д.Амарбаясгаланд хандан гаргалаа.

УИХ-ын гишүүн Ч.Лодойсамбуу "Ардчилсан тогтолцоог хамгаалж, нийгмийн тогтворгүй байдал үүсэхээс сэргийлэхийн тулд Ерөнхий сайд Л.Оюун-Эрдэнийг нэн яаралтай огцруулах үндэслэлтэй гэж үзэж байна.

Гишүүд маань нам харгалзахгүйгээр Монголын ардчилал, Монголын хамгийн үнэт зүйлийн төлөө нэгдэнэ гэж итгэж байна, нэгдээсэй гэж уриалж байна. Ж.Баярмаа гишүүн нэгдэхээ илэрхийлсэн, ингээд хоёр УИХ-ын гишүүн боллоо” гэв. Мөн "Ерөнхий сайд юу ч хийж болно гэж тооцож байгаа. Гэхдээ энэ боломжгүйг тэр залуу нэг бүтэн ном уншсан бол мэдэж байх ёстой. Жагсаж болохгүй, утсаар ярьж болохгүй, хүнтэй уулзаж болохгүй, тийм л нөхцөл бүрдчихсэн байна. Би сэтгүүлч байхдаа Ерөнхий сайд Л.Оюун-Эрдэнийн дарамтад янз, янзаар өртөж байсан" гэдгийг хэлэв.

УТААНЫ СОНСГОЛООР ЧУХАМ ЮУ ШИЙДСЭН БЭ?

“Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсгол Төрийн ордонд үргэлжиллээ. Ажлын хэсгийн шинжээчийг дүгнэлтийг Г.Жавхлан танилцуулав.

Тэрбээр, хуулийн хэрэгжилтийн хүрээнд  Агаарын тухай хуулийн хэрэгжилтийн үр дагаврын үнэлгээ хийгээгүй агаарын бохирдлыг бууруулах үйл ажиллагааны зохицуулалт, үйлчилж байсан хууль тогтоомжийн хүрээнд удирдлага, зохион байгуулалтын бүтцээс харахад агаарын бохирдлыг бууруулах чиглэлээр явуулж ирсэн үйл ажиллагаа, арга хэмжээний хэрэгжилт, гүйцэтгэлд дотоод хяналт, үнэлгээний ажил орхигдсон байна гэлээ.

Орчны бохирдлыг бууруулах үндэсний хорооны чиг үүргийн хэрэгжилтийн талаарх үндэсний хөтөлбөрийг (2017-2020 он) хэрэгжүүлэх төлөвлөгөөнд тусгасан арга хэмжээний 32.2 хувь нь хэрэгжсэн, 23.1 хувь нь хэрэгжээгүй, 44.7 хувь нь дутуу хэрэгжилттэй, хэрэгжилтэд тавих хяналт хангалтгүй, салбар хоорондын ажлын уялдааг хангаж ажиллаагүйг дурдав.

Агаарын бохирдлыг бууруулах чиглэлээр хэрэгжүүлсэн арга хэмжээний хэрэгжилтийг сайжруулахын тулд ахиц дэвшлийг үнэлэхийн зэрэгцээ бодлогын зорилтуудын биелэлтийг гаргаж, цаашид хэрэгжүүлэх шаардлагатай арга хэмжээг эрэмбэлэн, хүндрэлтэй асуудлаар тодорхой шийдвэр гаргах нэгдмэл удирдлагаар нэгтгэн зангидах талаар эзэн, хариуцагчгүй байгааг дурдлаа.

ДҮГНЭЛТ:

1. Хууль бодлого, шийдвэрийн хэрэгжилт хангалтгүй
2. Үр дүнгийн үнэлгээ хангалтгүй
3. Санхүүжилт, зарцуулалтын үр ашиг бага
4. Хяналт, үнэлгээний ажил хангалтгүй
5. Санхүүгийн зөрчил өндөр эрсдэлтэй түвшинд байна
6. Стратеги, төлөвлөлт хангалтгүй
7. Иргэдийн оролцоо, мэдээлэл хангалтгүй

Сонсголын төгсгөлд энэ бүх хэлэлцүүлэг, сонсголд оролцож үгээ хэлсэн иргэд, иргэний нийгмийн байгууллагын төлөөлөлд талархал илэрхийлээд цаашид Монгол Улсыг утаагүй болохын төлөө хамтарч ажиллахыг, сонсгол даргалагч Ж.Чинбүрэн уриалснаар өндөрлөв. Эцэст нь тэр их үр ашиггүй зарцуулалт, угаартсан 779 хүний амь нас /сонсголын үеэр нэгэн иргэн энэ тоон дээр утаанаас болж хэвлийдээ эндсэн ургийн тоог нэмэх ёстойг хэлж байсан/, төсвөөс "идэж уусан" дарга нарт ямар арга хэмжээ авах зэрэг мэдээлэл бүрхэг өндөрлөв. "Утааны" сонсгол хийснээр нийгэмд ямар үр дүн гарах юм бэ?

ЦАГААН САР АЙСУЙ...

Цагаан сарын үзэсгэлэн худалдаа болж буй газруудын байршлыг ЭНД дарж хүлээн авна уу.

Монгол түмний уламжлалт баяр "Цагаан сар"-ын Шинийн 1-н сар хүрэхгүй хугацааны дараа буюу 3 дугаар сарын 1-ний Бямба гарагт болно. Ууц, ул боов, бэлэг сэлт, бууз банш гээд эдгээр өдрүүдэд бэлтгэх зүйлс ундардаг билээ. Цагаан сард зориулсан үзэсгэлэн яармаг худалдааны төв, томоохон дэлгүүрүүдэд үргэлжилж байна. Бид ЖДҮ эрхлэгчдийг дэмжих зорилгоор жил бүр “Амар байна уу” үзэсгэлэн худалдааг сурвалжиллаа. Цагаан идээ дунджаар дараах үнээр худалдаалагдаж байна.

• Хорхой ааруул 30-35 мянга   
• Хэвтэй ааруул 40-45 мянга
• Урт хэвтэй багц ааруул-450 мянгаас-500 мянгын хооронд байв. Үүнд: 3 давхар ааруул, еэвэн хэлбэрт ааруул болон чимэглэх ааруул дагалдана.
• Өрөм- нэг килограмм нь 25-35 мянган
• Зөөхий- 40 мянга
• Хольсон тос- 30-35 мянга
• Айраг- 2 литр- 18 мянга
• Монгол шар тос 40-45 мянга
• Цөцгий - 30 мянган  төгрөгийн хооронд байв.

Дэлгэрэнгүйг та ЭНД дарж хүлээн авна уу. 

THE MONGOLZ "IEM KATOWICE" ТЭМЦЭЭНИЙ ХАГАС ШИГШЭЭД ШАЛГАРЛАА

ESL-ээс жил бүр зохиодог CS2 (Counter Strike 2)-ын томоохон тэмцээнүүдийн нэг "Intel Extreme Masters Katowice 2025" Польшийн Катовиц хотод үргэлжилж байна.

$1,000,000 шагналын сантай тэмцээнд уригдан оролцож playoffs шатанд нь шалгарсан анхны Ази баг болсон Монголын "The MongolZ" Туркийн "Eternal Fire" багтай тоглолоо.

Бямбасүрэнгийн "bLitz" Гарьдмагнай ахлагчтай залуус 2-0 (Anubis 13-7, Mirage 22-18) харьцаагаар ширүүн тулааны эцэст хожиж тэмцээний хагас шигшээ шатанд шалгарлаа. Тоглолтод Банзрагчийн "910" Өсөхбаяр 93.5 ADR (Average Damage per Round)-тайгаар багаа тэргүүлэв. Бусад багуудын дэлгэрэнгүй мэдээллийг ЭНД дарж хүлээн авна уу.

ХҮЙТНИЙ ЭРЧ ЧАНГАРАВ

Өнгөрч буй долоо хоногт хүйтний эрч эрс чангарч, шөнөдөө -40 градус, зарим өдрүүдэд өдөртөө 28 грудас хүрлээ. Монгол уламжлалт тооллогоор одоо идэр гурван есийн төгсгөл буюу зургаан ес үргэлжилж байна. Үүний дараа хүйтний эрч сулардаг жамтай.

Гэхдээ хаврын саруудад нутгийн зүүн хагаст олон жилийн дунджаас дулаан, хур тунадас харьцангуй багатай байх төлөв ажиглагдаж байгаа хэдий ч агаар мандлын төлөв богино хугацаанд хурдан өөрчлөгдөн агаарын температурын өдөр шөнө, хоног хоорондын зөрөө их, говь тал хээрийн бүс нутгаар салхи шуургатай байх магадлал өндөр байна. Ирэх саруудын цаг агаарын төлвийг ЭНД дарж хүлээн авна уу.

ДЭЛХИЙН МЭДЭЭ: ТРАМПЫН ШИЙДВЭРҮҮД...

АНУ-ын Ерөнхийлөгч Дональд Трамп худалдааны түнш улсууддаа тариф ногдуулах нь олон улсын хэмжээнд инфляцын шинэ давлагаа бий болгох магадлалтай гэж шинжээчид анхааруулж байна.

БНХАУ-ын эсрэг авч хэрэгжүүлсэн арга хэмжээ нь Дональд Трамп сонгуулийн компанит ажлынхаа үеэр амласан амлалтаа бодитоор хэрэгжүүлж буйг харуулж байна гэхэд болохоор байгаа юм. БНХАУ хариу арга хэмжээ авч эхэлснээр олон улсын хэмжээнд инфляцын төлөв хэрхэн өөрчлөгдөх нь асуулт дагуулж байна. Мөн Канадын татварыг нэмэх шийдвэрээ түр царцаажээ.