УИХ-ын чуулганы нэгдсэн хуралдаан өнөөдөр 10:00 цагаас эхэллээ.

Өнөөдрийн хуралдаанаар дараах асуудлуудыг хэлэлцэнэ. 

• Байнгын хорооны даргыг сонгох тухай асуудал;
• “Тогтоолд өөрчлөлт оруулах тухай” УИХ-ын тогтоолын төсөл;
• Элчин сайдыг эгүүлэн татах тухай асуудал;
• УИХ-ын гишүүний тангараг өргөх ёслолын үйл ажиллагаа;
• Цаг үеийн шинжтэй асуудлаарх Монгол Улсын Ерөнхий сайдын мэдээлэл: “Дархлаажуулалтын явцын талаар”.

УИХ-ын дарга Г.Занданшатар Монгол цэргийн өдрийн мэндчилгээ дэвшүүлсэн бөгөөд Ерөнхийлөгч чуулганы нэгдсэн хуралдаанд оролцож байна. 

УИХ-ын гишүүн Б.Пүрэвдорж чуулганы нэгдсэн хуралдаанд үг хэлэх хүсэлт өргөдлөөр өгсөн бөгөөд түүнийг үг хэлүүлэхгүй байна хэмээн УИХ-ын даргын индэр, үг хэлдэг индэр дээр очиж үг хэлэх эрхээ эдлэхийг хүслээ. 

Ж.МӨНХБАТ ТӨРИЙН БАЙГУУЛАЛТЫН БАЙНГЫН ХОРООНЫ ДАРГА БОЛЛОО 

УИХ-ын дарга хэлэлцэх асуудалд орсон тулд дэг сахихыг Б.Пүрэвдоржид танилцууллаа. Ингээд байнгын хорооны даргыг сонгох асуудлыг танилцуулж байна. УИХ-ын Төрийн байгуулалтын байнгын хорооны дарга Л.Энх-Амгаланг Боловсрол, шинжлэх ухааны сайдаар томилсон тул түүний оронд УИХ-ын гишүүн Ж.Мөнхбатыг томилохыг байнгын хороо дэмжээд байгаа юм. 

УИХ-ын гишүүд нэр дэвшигчээс асуулт асууж, үг хэлж байна. 

УИХ-ын гишүүн Б.Энх-Амгалан: Ардын хувьсгал ялаад 100, Ардчилсан хувьсгал ялаад 30 жил болж байна. Бид хүнлэг, ардчилсан, иргэний нийгэм байгуулна гэдэг. Хүний эрх, эрх чөлөөг дээдэлсэн нийгмийг бий болгоно гэдэг ч зөрчигдөж байна. Тангараг өргөсөн төрийн тусгай албан хаагчид хүний эрхийг зөрчиж байна. Хүмүүсийг эрүүдэн шүүж, ял тулгаж, бизнес болон бусад зүйлийг нь дээрэмдэж байна. Хонгил үүслээ. Шударга шүүгчид, хууль хяналт, төрийн албан хаагчид байна. Эдгээрийг хамруулан ойлгож болохгүй. Ганц зүйлийг буруутгаж байгаа нь тэнд завхрал үүсгэж буй хүмүүс. Тиймээс тэдгээрийг зайлуулах хэрэгтэй. 

УИХ-ын гишүүн Б.Пүрэвдорж: Би хэлэлцэх асуудлын дараалалтай холбоотой үг хэлэх гэсэн боловч, үг хэлүүлэхгүй байна. Энэ танхимд дэг зөрчсөн олон үйлдэл болдог. Та нар МАН-ын даргынхаа постыг л уншдаг юм байна. Ард түмний дунд байгаа санал хүсэлтийг тоодоггүй юм байна. Шүүхээр асуудлыг эцэслэн шийдэж байж тангараг өргүүлэх ёстой шүү дээ. УИХ-ын гишүүний бүрэн эрхийн хүрээнд асуудал нь шийдэгдэхгүй юм байна. Танай шүүхийнхэн уг нь дор нь шийднэ биздээ. Манай намын бүлэг завсарлага авна. Тангараг өргөх асуудлыг хойшлуулах ёстой. 

УИХ-ын дарга Г.Занданшатар: Тангараг өргөх нь хэлэлцэх асуудал биш. Үндсэн хуулийн заалтаар явж байна. Ард түмний саналыг нэг гишүүн санал гаргаад өөрчилдөггүй юм. 

УИХ-ын гишүүн Н.Алтанхуяг: Та нарын хэнийгээ даргаа болгох чинь хамаагүй. Юу хийх вэ гэдэг чинь л чухал. Төрийн гурван өндөрлөг энэ танхимд орж ирээд олон улсын хэмжээнд хэрүүл зодооноо хийж байна. 62 хүнтэй МАН аятайхан ажилламаар байна. Та нар нэлээн оодорч байх шиг байна. Сонгуулийн хууль мөнгөний хууль болсон. Өөрчлөх байх гэсэн өөрчлөгдсөнгүй. Монголын төрийг мөнгөөр босгох уралдаан тэмцээн хийж байна. 

УИХ-ын гишүүн Г.Мөнхцэцэг: Дундговь аймгийн нөхцөл байдал хүнд байгаа тул энэ тал дээр анхаарч ажиллахыг хүсэж байна. 

УИХ-ын гишүүн Ж.Мөнхбат: Саналыг хүлээн авч байна. Саяхан болсон байгалийн гамшигт үзэгдэл Монгол Улсад өмнө нь болж байгаагүй гамшигт үзэгдэл болж олон айл хохирол амсаж, хүний амь эрсэдсэнд харамсаж байна.

УИХ-ын гишүүн С.Ганбаатар: Сү.Батболд Монголыг хага базчихсан юм байна. МАН-ыг хага базчихсан юм байна. Төрд үйлчлэх ёстой хүн өөртөө ашигтайгаар ажилласан байна. Өөрөө гүтгүүллээ л гээд байна. Шүүхийн асуудлыг нарийн тайлбарлахгүй байна. 

Санал хураалт явуулахад чуулганы хуралдаанд оролцож байгаа 67 гишүүний 48 нь дэмжсэнээр Ж.Мөнхбат УИХ-ын Төрийн байгуулалтын байнгын хорооны даргаар сонгогдлоо. 

28-Р ТОЙРГИЙН НӨХӨН СОНГУУЛИЙГ ЕРӨНХИЙЛӨГЧИЙН СОНГУУЛИАС ТУСАД НЬ ЗОХИОН БАЙГУУЛАХААР БОЛЛОО

Дараагийн хэлэлцэх асуудал “Тогтоолд өөрчлөлт оруулах тухай” УИХ-ын тогтоолын төсөл. 28-р тойрогт хийх нөхөн сонгуулийг Ерөнхийлөгчийн сонгуультай хамтатгахаар болсныг эргүүлэн тусад нь болгож байгаа юм. 

УИХ-ын гишүүн Т.Доржханд: Мөнгө хэмнэх үүднээс хоёр сонгуулийг хамтад нь явуулах нь гэж ойлгосон. Үр дүнд нь хэмнэлт гарах нь гэж ойлгож байсан. Хэрэв тусад нь зохион байгуулбал нэг тэрбум төгрөгийн зардал гарах нь гэж байсан. Тусад нь хийсэн бол ямар хэмжээний зардал гарах вэ. Яагаад тусад нь зохион байгуулах болсон юм бэ. Хэрэв тусад нь зохион байгуулах юм бол нэр дэвшээд УИХ-ын гишүүн болсон хүн нь өөрийнхөө саналаар гишүүнээсээ татгалзаж дарга болсон. Тэр болсон дарга нь нийслэлчүүдийг самарч байна шүү дээ. Хэн нэгэн хариуцлага хүлээхгүй юм уу. Мэргэжлийн бус, мэдээлэлгүй, хүний эрхийн мэдрэмжгүй шийдвэр гаргаад байгаа хүн чинь өнөөдөр энд сууж байх ёстой байтал тэнд очоод самраад байна шүү дээ. Боловсон хүчний арвин нөөцтэй гэдэггүй билүү МАН. Татвар төлөгчдийн мөнгөөр их хэмжээний санхүүжилт гаргах болж байгаа энэ үед МАН хариуцлага хүлээхгүй бол тэр хүндээ хариуцлага хүлээлгэ. 

СЕХ: Нэг өдөр санал хураалт явуулах нь зардал хэмнэгдэх хэдий ч тусдаа хуулиар, тусдаа зохицуулалттай хуулиар зэрэгцүүлж явуулах нь зохион байгуулалт, техникийн хүндрэл үүснэ. 

Ерөнхийлөгч Монгол Улсаас АНУ-д суугаа Элчин сайд Ё.Отгонбаярыг эгүүлэн татах санал гаргасан бөгөөд уг асуудлыг МАН-ын бүлэг, Аюулгүй байдлын байнгын хороогоор хэлэлцээд эгүүлэн татах үндэслэлгүй хэмээн үзсэн юм. 

Эгүүлэн татах үндэслэлийг Ерөнхийлөгч Элчин сайд Ё.Отгонбаярын ажилласан сүүлийн гурван жилийн хугацаанд хоёр орны худалдааны эргэлт, хөрөнгө оруулалт, эдийн засгийн хамтын ажиллагаанд дорвитой ахиц гаргаагүй, мөн эдийн засгийг сэргээх, малчин ард иргэдийн амьдралыг сайжруулахад чухал үүрэгтэй, Монголын ноос, ноолууран бүтээгдэхүүнийг АНУ-ын зах зээлд татварын хөнгөлөлттэй экспортлох боломж бүрдүүлэх “Гуравдагч хөршийн худалдааны тухай” хуулийн төслийг АНУ-ын Хууль тогтоох байгууллагаар батлуулах талаар хангалттай санаачилга гаргаж ажиллаагүй гэж үзсэн. Мөн  манай улсын байгалийн баялгийн орлогыг нэр бүхий улстөрчид гадаадад, оффшор дансанд байрлуулсан байж болзошгүй асуудлаар АНУ-ын Нью-Йорк мужид явагдаж буй шүүхийн маргааны талаар хуулийн байгууллагын шийдвэр гараагүй байхад олон нийтийн сүлжээгээр дамжуулан илт улс төржсөн байр суурь илэрхийлсэн нь Дипломат албаны тухай хуулиар хүлээсэн үүрэг болон төрийн албан хаагчийн ёс зүйд нийцэхгүй гэж үзсэн байна.