Өнөөдөр Ардчилсан намын Үндэсний бодлогын хороо хуралдаж, шинэ намын даргыг сонгоно. Энэ хурал Төрийн ордонд үргэлжилж буй бөгөөд намын даргад нэр дэвшигчид илтгэлээ танилцуулж буй. 

Тус намын даргад УИХ-ын гишүүн Ж.Баярмаа, Б.Пүрэвдорж, О.Цогтгэрэл, ҮБХ-ны гишүүн Б.Отгонбат нар нэрээ дэвшүүлэн өрсөлдөж байна. 

Намын даргыг сонгохдоо санал хураалтыг шат дараатайгаар зохион байгуулна гэж мэдэгдсэн бөгөөд эхний шатны санал хураалтад 10-аас доош хувийн санал авсан нэр дэвшигчид хасагдах журмаар үргэлжилнэ. 

Өөрөөр хэлбэл эхний санал хураалтад 50-аас дээш буюу олонхын санал авсан ч шууд намын даргаар сонгогдоно гэсэн үг биш юм. Хоёр нэр дэвшигч үлдэх хүртэл санал хураалт явуулна. 

Өчигдөр буюу наймдугаар сарын 30-ны өдөр нэр дэвшигчдийн дунд мэтгэлцээн зохион байгуулсан юм. Мэтгэлцээний үеэр нэр дэвшигчдийн хэлсэн үгнээс хүргэж байна. 

О.Цогтгэрэл: Ардчилсан нам манлайллын стратегийг хэрэгжүүлнэ. Миний хувьд систем бүтээж ялалт авч ирэхийн төлөө бодлогоо хэрэгжүүлнэ.

Б.Отгонбат: Судалгаанд суурилсан хөгжлийн бодлого, өрсөлдөх чадвараа тооцоолж Монгол Улсдаа өөрчлөлт авч ирнэ. Миний давуу тал “Дэлхийтэй харилцах”. Тиймээс гадаадын хөрөнгө оруулалт татсан, итгэл татсан Монголын төлөө бодлогоо хэрэгжүүлнэ. Бид бүгдээрээ хамтран ажиллаж ардчилсан намыг дахин сэргээнэ.

Б.Пүрэвдорж: Би эх орныхоо 160 гаруй суманд очиж ажиллаад байна. Зөвхөн сонгогдсон тойргийнхоо төдийгүй Монгол Улсынхаа бүх иргэдийн хүсэл зоригийн төлөө ажилладаг. Өнгөрсөн парламентын хамгийн олон хууль тогтоол батлуулсан гишүүний хувьд надад Ардчилсан намыг ялуулах туршлага бий.

Ж.Баярмаа: Бид бүгдийн давуу талууд нийлж байж Ардчилсан намыг ялалтад хүргэнэ.  Бодлогын судалгааны хүрээлэнд бид ач холбогдол өгч байх ёстой. Улстөрч хүн бодлоготон, үзэл санаандаа үнэнч, алсын хараатай, үнэт зүйлсээ хэрэгжүүлэх тууштай хүн байх ёстой. Миний хувьд энэ зарчмын төлөө ажиллаж чадна. “Зориг” үгүй бол манлайлал үгүй. Няцашгүй чанар надад бий.