Евро-5 стандартын шатахуун болон энгийн шатахууны ялгаа, иргэдийн ойлголттой холбоотойгоор АҮЭБЯ-ны Газрын тосны бодлогын хэрэгжилтийг зохицуулах газрын дарга Ч.Хишигдалай дараах мэдээллийг өглөө.

Тэрбээр "Нэгдүгээр сард 136 мянган тонн АИ-92 автобензин захиалсан. Үүний тал хувь нь энгийн, тал нь Евро-5 стандартынх. 

ШТС-ын нэг хошуугаар Евро-5 стандартын, нөгөө хошуугаар нь энгийн АИ-92 бензин зарж байхад иргэд энгийн дээр нь илүү дугаарладаг нөхцөл байдалтай байна. 

Агаар, орчны бохирдолтой холбоотойгоор цаашид Евро-5 стандартын бүтээгдэхүүн рүү шилжинэ. 

Уг хоёр бүтээгдэхүүн ганц, хоёр удаа хийхэд бол ялгаа нь мэдэгдэхгүй. Евро-5 стандартын бүтээгдэхүүн нь илүү хөнгөн бас илүү шатамтгай. Автомашинаасаа хамаараад энгийн АИ-92-оос 5-10 хувиар илүү зарцуулагдана. 

Тэгэхээр хүмүүс энгийн нь илүү ашигтай гэдэг талаас харж байж магадгүй. Гэхдээ бид хүрээлэн буй орчин, хүний эрүүл мэндийг бодож аажмаар энэ төрлийн бүтээгдэхүүн рүү шилжих ёстой. 

Нийслэлийн хувьд 2026 онд Евро-5 руу шилжинэ гэсэн захирамж гаргасан. Манай улсад бүтээгдэхүүн нийлүүлж буй Ангарскийн үйлдвэр анх 2025 онд 100 хувь Евро-5 руу шилжинэ гэж байсан ч нөхцөл байдалтай холбоотойгоор хойшилж байна. 

Нийлүүлж байгаа үйлдвэр нь 100 хувь шилжихэд бид хүссэн хүсээгүй дагаад шилжинэ. Үнийн хувьд хоёр бүтээгдэхүүн 400-500 төгрөгийн зөрүүтэй байна. Онцгой албан татвараар үнийн зөрүүг бага байлгах боломж харагдаж байгаа" гэв.