Агаарын бохирдлыг бууруулах Үндэсний хороо 2026 онд нийслэл Улаанбаатар хотоос гадна аймгуудын агаарын бохирдлыг бууруулахад анхаарч, томоохон суурин газруудад тохирох шийдлийг судалж байгаа аж.

Энэ хүрээнд БНСУ-ын GIGAette компанийн удирдлагууд болон “KAIST” их сургуулийн профессорыг хүлээн авч уулзаж, төслийн танилцуулга сонсжээ.

БНСУ-ын “KAIST” их сургуулийн профессорууд нарны эрчим хүчийг хуримтлуулан дулаан үйлдвэрлэх төслийг өнгөрсөн онд Архангай аймагт туршилтаар хэрэгжүүлсэн байна. Уг төслөө энэ жил Хөвсгөл аймгийн Мөрөн суманд хэрэгжүүлэхээр ирснээ Агаарын бохирдлыг бууруулах Үндэсний хорооны Ажлын албанд танилцуулав.

Мөрөн сумын төвийн шугам сүлжээнд холбогдсон 150 айлыг нарны эрчим хүчээр хангах төслийн хөрөнгө оруулалтын 60 хувь буюу 700 сая воныг БНСУ-ын Засгийн газрын буцалтгүй тусламжаар санхүүжүүлж буй аж. Үлдэгдэл 40 хувийг орон нутаг санхүүжүүлэх аж.

Эх сурвалж: Агаарын бохирдлыг бууруулах үндэсний хорооо