Ерөнхий сайдыг огцруулах тухай УИХ-ын 95-р тогтоол Үндсэн хууль зөрчсөн гэж Үндсэн хуулийн цэцийн Их суудлын хуралдаанаар дүгнэж, дүгнэлтээ өчигдөр 22.50 цагт уншиж танилцуулсан.

Цэцийн дүгнэлтийн талаар УИХ-ын гишүүн, хуульч С.Эрдэнэболдын байр суурийг тодруулахад, Үндсэн хуулийн цэцээс маш тодорхой, олон хуудас дүгнэлт гаргасан. Үндсэн хуулийн эрх зүй гэж бие даасан судлагдахуун байдаг.

Монгол Улсын шилдэг эрдэмтдээс бүрдсэн Цэцийн гаргасан шийдвэрийг хүлээн зөвшөөрсөн гэхээс илүү хүндэтгэж дагаж байна. “Монгол Улсын Ерөнхийлөгч үүрэг өгсөн, нэг талд ажиллалаа” гэх зэрэг хардлага хүмүүст байж болно. Гэвч Үндсэн хуульд тайлбар өгсөн Цэцийн шийдвэрийг авч үзэх ёстой.

Үндсэн хуулийн цэц эрх зүйн үр дагавар бүхий үйл явдалд эрх зүйн үр дагавар бүхий шийдвэр гаргасан. Эрхзүйн үр дагавар нь Үндсэн хууль зөрчсөн гэдэг шийдвэрт хүрчээ. Тиймээс яагаад, яаж зөрчсөн, ямар процедурыг алдсан гэх мэт асуудлууд дахин яригдана. Энэ бол өнөөдрийн хэн нэг хүний тухай асуудал биш. Монгол төрийн Үндсэн хуулийн маш том судлагдахуун болж байна.

Би хувь хүний хувьд энэ үйл явдлаас гурван зүйл олж харж байна. 

• 1-рт, Улс төрийн энэ үйл явдал маш сайн зүйл боллоо. Олон жил засаглаж ирсэн эрх мэдэлтэй хүмүүс бие биеийнхээ алдаа оноо хулгай зэлгийг хайр найргүй илчилсэн нь иргэдийн мэдэх эрхийг хангалаа. Сэтгэл хөдлөл шингэсэн зүйл байгаа. Сэтгэл хөдлөлтэй хэсгийг нь хасаад факт, логик тэр бүхнийг нь харвал бид эндээс маш зүйл мэдэж авлаа. Энэ бол ард түмний маш том ялалт.
• 2-рт, Цаашид нээлттэй, ил тод, эрх зүйт нийгмийн төлөвшүүлэхгүй бол намын явцуу эрх ашгаар ханцуй дотроо наймаалцаад байвал ямар хортой вэ гэдэг судлагдахуун бий болсон нь маш сайн хэрэг.
• 3-рт, Нэг нам хүчтэй сөрөг хүчингүй олон жил дангаараа засаглах, хуулийн дээр гарч эрх мэдлийг атгах нь улс орны хөгжил, өрсөлдөх чадварт ямар хор хохиролтой вэ гэдгийг бид ойлгож авч байна. Энэ бол улс төрийн маш том хичээл боллоо.

Хоёр гурван тал болж зөрчилдөж байгаа хүмүүс бол энэ үзэгдлийн дүрүүд. Хэн нь зарчим барьсан бэ, хэн нь явцуу ашиг сонирхолд хөтлөгдөж авсан бэ гэдгийг хожим эрх зүйгээр шүүнэ. Цаг хугацаа шүүнэ.