Сүүлийн 24 цагт Улаанбурхан өвчний батлагдсан есөн тохиолдол бүртгэгджээ.

Мөн Халдварт Өвчин Судлалын Үндэсний төвийн Эрчимт эмчилгээний тасагт Улаанбурхан өвчний улмаас таван хүүхэд эмчлүүлж буйг ЭМЯ-наас мэдээллээ.

Энэ талаар ХӨСҮТ-ийн Халдвартын клиникийн Эрчимт эмчилгээний тасгийн эрхлэгч  М.Ууганчимэг " Эрчимт эмчилгээний тасагт амьсгалын дутагдалтай, биеийн байдал маш хүнд хүүхдүүд эмчлэгддэг. Бага насны, ялангуяа ой хүрээгүй болон вакцинд хамрагдаагүй хүүхэд хүнд өвддөг тул Улаанбурханы эсрэг вакцинд хүүхдүүдээ хамруулахыг хүсье.

Томуугийн улирал үргэлжилж буй энэ үед дархлаажуулалтад хамрагдаагүй хүүхдүүд Улаанбурхан өвчний халдвар нэмж авснаар илүү хүнд өвддөг.

Иймд олон нийтийн газраар бага насны хүүхдээ бүү дагуулж яваарай. Мөн өөрсдөө ч гадуур явахдаа амны хаалтаа зүүж, гаднаас орж ирэхдээ гараа зөв угаах зэргээр эрүүл ахуйн дэглэмээ сайтар баримтлаарай.

Улаанбурхан бол вакцинаар сэргийлэгддэг өвчин. Иймд товлолд хугацаандаа тус вакциндаа хамрагдахыг уриалж байна" гэв.