Монголын Тостын нурууны хоёр өөр үлийн газарт цоохор ирвэсний нийт таван эрүүл зулзага амьдарч буйг судлаачид илрүүлжээ. Энэ нь дэлхийн хэмжээнд ховор тохиолддог, цоохор ирвэсний үлийг шууд судалсан зургаа, долоо дахь тохиолдол болж байгаа юм.

Судлаачид эх ирвэсүүд нь ан хийж явах үеэр үлийн газарт болгоомжтойгоор очиж, зулзагануудын тоо, жин, хүйсийг тогтоож, ДНХ шинжилгээний зориулалтаар шүлсний арчдас авчээ.

Мөн ирээдүйд таних зорилгоор зулзагануудын арьсан дор бичил чип суулгасан байна. Энэхүү үйл явц хэдхэн минут үргэлжилдэг бөгөөд судлаачид аль болох бага сандрал, догдлол үүсгэхийг чухалчилдаг. Дараа нь эхүүд нь үлийдээ эргэн ирж, хэвийн амьдралдаа шилжих эсэхийг хянан ажигладаг.

Энэхүү хоёр үлийн судалгаа нь 2008 оноос эхлүүлсэн, урт хугацааны хөтөлбөрийн хүрээнд хийгдсэн ба цоохор ирвэсний экологийг ойлгох, хамгааллын бодлогод үнэтэй хувь нэмэр оруулах ховор боломжийг бүрдүүлжээ.

Үлийн газар гэдэг нь зэрлэг амьтад, ялангуяа махчин амьтад үр төлөө төрүүлж өсгөдөг, түр амьдрах байр буюу нялх зулзагаа нуудаг аюулгүй газар юм.