УИХ-ын намрын чуулган ирэх даваа гараг буюу 9-р сарын 15-нд эхэлмэгц Засгийн газраас хуулийн хугацаандаа өргөн мэдүүлсэн 2026 оны төсвийн тухай хуулийн төслийг хэлэлцэж эхэлнэ.

Сангийн яамны Төрийн нарийн бичгийн дарга Ж.Ганбат тэргүүтэй газрын дарга нар өнөөдөр ирэх оны төсвийн төслийг салбар салбараар нь тоймлон сэтгүүлчдэд мэдээлэл өглөө.  

НӨАТ-ын буцаан олголт 2 хувь байгааг 5 хувь болгохоор шийдвэрлэснийг Ерөнхий сайд Г.Занданшатар өнгөрсөн наймдугаар сард мэдэгдсэн. Засгийн газрын энэ бодлого ирэх оны төсөвт тусгалаа олсон бөгөөд буцаалтыг 5 хувьд хүргэх шийдвэр үе шаттайгаар хэрэгжих юм.

Сангийн яамны Төсвийн бодлого, төлөвлөлтийн газрын дарга М.Санжаадорж, НӨАТ-ын баримт бүртгүүлж буй нийт иргэдийн 75 хувь нь сард 1 саяас доош үнийн дүнтэй худалдан авалт хийдэг ч буцаалтын 25-хан хувийг авдаг. Хамгийн өндөр хэрэглээтэй хүмүүс 25 хувийг эзэлж байгаа ч буцаалтын 75 хувийг авч байна.
НӨАТ бол албан татвар. Монгол шиг буцаалт өгдөг улс орон дэлхийн дээр хуруу дарам цөөн байдаг. Энэ бол хэрэглээний татвар. Тиймээс цаашид хэрэглээ ихтэй бол өндөр татвар төлнө гэсэн зарчим баримтална.

2026 онд сард нэг саяас доош худалдан авалт хийсэн иргэд 5 хувийн буцаан олголт авна гэв.

Сангийн яамны Санхүү, төсвийн судалгааны газрын дарга Г.Золбоо, Сангийн яам 2026 оны төсвийн төслийг боловсруулахдаа төсвийн эдийн засаг дахь оролцоог бууруулах бодлого барьсан. Илүү хувийн хэвшилд суурилсан эдийн засгийн загварт шилжинэ. Энэ бодлогын хүрээнд ирэх оны төсөв иргэдийн бодит орлогод 7 хувийн өсөлт авчрах тооцоолол хийсэн.

Үүн дээр НӨАТ-ын буцаалт 2 хувийг 5 хувь болгохоор төсөвлөсөн ба энэ орлого иргэдийн халаасанд шууд орно.
Тэгэхээр жишээлбэл, Нэг өрх сард 2.8 сая төгрөгийн зарлага гаргасан бол үүнийг тухайн өрхийн гурван гишүүн сая сая төгрөгөөр и-баримтад бүртгүүлбэл өрхийн орлого 84 мянган төгрөгөөр нэмэгдэнэ. Тухайн өрхийн бодит орлогыг 2.5 хувь орчмоор нэмэгдэнэ гэсэн тооцоолол гарч байна. НӨАТ-ын буцаан олголт хэрэглээ болж иргэдийн халаасанд очдог гэв.



Фото эх сурвалж: Сангийн яам