УИХ-ын намрын чуулган өчигдөр нээлтээ хийж, 2026 төсвийн тухай хуулийн төслийг хэлэлцэж эхэллээ. Монгол Улсын Ерөнхий сайд Г.Занданшатар УИХ-ын чуулганы нэгдсэн хуралдаанд ирэх оны төсвийн төслийг танилцуулснаас хэсэгчлэн хүргэж байна.



Ерөнхий сайд, Бид 2026 оны төсвийг мөнгөний бодлоготой уялдуулснаар:

Засгийн газар ирэх онд эдийн засгийн өсөлтийг 5.7 хувьд хүргэх, цалин орлогыг хумслагч инфляцийг  7 хувиас давуулахгүй хазаарлах, экспортыг 16.7 тэрбум ам.долларт хүргэх зорилт дэвшүүлж, 2026 оны төсвийн төсөлд тусгалаа.

Төсвийн орлогоо 31 их наяд 600 тэрбум төгрөг, төсвийн зарлагыг 32 их наяд 980 тэрбум төгрөг, төсвийн тэнцвэржүүлсэн тэнцлийг 1 их наяд 380 тэрбум төгрөгийн алдагдалтай байхаар тооцлоо.

Гадаад зах зээл, түүхий эдийн үнийн төлөв, дотоод эдийн засгийн эрсдэл, боломжийг нягт харгалзан төсвийн орлогоо аль болох бодитой, хэрэгжихүйц байдлаар төлөвлөхийг зорилоо. Улсын төсөв бол Монгол хэмээх нэгэн их өрх айлын орлого зарлага, амьдрал ахуй ямар байхыг шийдэх хууль билээ.

Улсын төсөв бол эмч, багш, төрийн албан хаагчдын цалин хөлс, эмнэлгийн эм тариа, сургууль, цэцэрлэг, айл өрхийн гэрэл дулаан билээ. Татвар төлөгчийн хөдөлмөрийн дусал бүр зөв зарцуулагдаж, ард иргэдийн амьдралд бодит өгөөжөө өгөх ёстой гэв.