ОНЦЛОХ ҮЙЛ ЯВДЛУУД

Он солигдохын өмнө Ерөнхий сайд Л.Оюун-Эрдэнэ, Ерөнхийлөгч У.Хүрэлсүх нар телевизээр мэндчилгээ дэвшүүлэв.

Засгийн газрын тэргүүн хэлсэн үгэндээ Үндэсний баялгийн сангийн хуулийг баталж, гадаад бондуудын өрийг төлж, зээлжих зэрэглэл сайжирч, Үндсэн хуулиар 126 гишүүнтэй шинэ парламент сонгуулийн холимог тогтолцоогоор бүрдэж, ардчиллын хоёр дахь давлагаа эхэлснийг онцлов.  

Шинэ парламентад анх удаа 32 эмэгтэй гишүүн сонгогдож, Азидаа тэргүүлж эхэллээ. Нийт 126 гишүүний 80 нь анх удаа сонгогдсон гишүүд байгаа нь улс төрд томоохон хэмжээний үе солигдох үйл явц 2024 онд болсныг харуулж байна гэв.

Харин төрийн тэргүүн УИХ 2025 оны төсвийг хоригийн дагуу алдагдалгүй баталж, экспорт түүхэн дээд хэмжээнд хүрснийг магтав. 

Төрийн байгууллагууд албан хэргээ кирилл болон үндэсний бичгээр хөтөлж эхэллээ

2015 онд батлагдсан Монгол хэлний тухай хуулийн нэг заалтыг арван жилийн дараа буюу 2025 оны нэгдүгээр сарын 1-нээс хэрэгжүүлэхээр тусгасан. Хууль батлагдсанаас хойш бэлтгэл хангуулахаар хугацаа өгсөн энэ заалт нь "Төрийн захиргааны бүх шатны байгууллагууд албан хэргээ кирилл болон үндэсний бичгээр хослуулан хөтөлнө" гэсэн зохицуулалт юм.
 
Энэ заалтыг 2025 оны ажлын эхний өдөр буюу нэгдүгээр сарын 2-ны өдрөөс мөрдөж эхэллээ. 

Энэ оны эхний өдөр Бөөрөлжүүт цахилгаан станц 40МВт эрчим хүч нийлүүллээ. Тус станц энэ сарын 6-наас 150 МВт буюу бүрэн хүчин чадлаараа ажиллах юм. Ингэснээр 2024-2025 өвлийн оргил ачааллын үед цахилгааны хязгаарлалт хийхгүй байх боломж бүрдэж, нийслэлчүүдийн аминд орох нь.

“Бодь интернэйшнл” группийн ТУЗ-ийн дарга Д.Баясгалан, Төсөлтэй холбоотой хоёр зүйлийг хүмүүст зориулж хэлэхийг хүсэж байна. Нэгдүгээрт, Үнэ тарифыг 2016 оны Хөрөнгө оруулалтын гэрээ, Цахилгаан худалдах, худалдан авах гэрээнд тодорхой зааж өгсөн. Тэр гэрээнд эрчим хүчээ 28 жилийн турш нэг тарифаар нийлүүлнэ гэж заасан.

Тэр тариф ОХУ болон БНХАУ-аас худалдан авч буй тарифаас 30-35 хувиар хямд байгаа. Тэгэхээр төрөөс эрчим хүчний үнэ тарифыг нэмсэн нь манай станцын үйл ажиллагаатай ямар ч холбоогүй, олон жилийн өмнө шийдсэн асуудал гэдгийг онцолсон юм.

Ерөнхийлөгчийн Тамгын газрын дарга, "Ачит ихт" компанийн хувьцаа эзэмшигч П.Цагааныг Сингапурт саатуулжээ. 

Түүнийг Эрдэнэт үйлдвэрийн технологид тохирохгүй хаягдал хүдрийн үүсмэл ордын нөөцөд үйлдвэрлэлийн боловсруулалт хийж, катодын зэс үйлдвэрлэдэг "Ачит ихт" компанийн үйл ажиллагаатай холбогдуулан шалгах гэж буй аж. 

П.Цагааныг саатуулсан тухай мэдээллийг тус компаниас үгүйсгэсэн бол ХЗДХ-ийн сайд О.Алтангэрэл "П.Цагааныг Сингапурт саатуулсан нь үнэн" гэж энэ сарын 2-нд нотлов. Энэ баривчилгаа "Ачит ихт" компанийн 34 хувийг төр эзэмших гэсэн төлөвлөгөөтэй холбоотой байж болзошгүй.   

Сурагчид, оюутнуудын өвлийн амралт эхэлсэн. Хэрэв та хүүхдүүдээ хотын гадна, цэвэр агаарт амраан, хажуугаар нь эмчилгээ сувилгаанд явуулахаар бодсон бол энэ мэдээг уншаарай.  Хүүхдээ хорт утаанаас хол, дархлаагаа сэргээж амарч болох амралт, сувиллын газруудын хаяг байршил, үнийн мэдээллийг багцлав.