Өнгөрч буй долоо хоногт болсон үйл явдлуудаас тоймлон хүргэж байна.

Орон нутгийн дугаартай автомашинаар хотод 48 цагаас дээш хугацаанд зорчвол өдөрт 5000₮ төлнө

Есдүгээр сарын 1-нээс орон нутгийн тээврийн хэрэгсэл нийслэлд 48 цагаас дээш хугацаанд зорчвол хоног тутамд 5000 төгрөг төлөхөөр болжээ.

Нийслэлийн Засаг дарга 2024 оны наймдугаар сарын 12-ны өдөр захирамж гаргасан. Захирамжийн дагуу есдүгээр сарын 1-нээс эхлэн Улаанбаатар хотод нэвтрэн орж ирж байгаа орон нутгийн дугаартай тээврийн хэрэгслээс хоног тутамд 5000 төгрөгийн нэхэмжлэх үүсэх болохыг иргэдэд анхааруулж байна.

Гавьяат тамирчин М.Анхцэцэгийг гурван өрөө орон сууцаар шагналаа

Монголын хүндийн өргөлтийн холбооны Удирдах зөвлөлөөс Монгол Улсын гавьяат тамирчин Мөнхжанцангийн Анхцэцэгийг гурван өрөө орон сууцаар шагнаж, тамирчинд батламжийг гардууллаа.
 
Хүндийн өргөлтийн спортоор 17 жил хичээллэж, Монгол Улсынхаа нэрийг дэлхийд гаргасан тамирчин бүсгүй болон багш дасгалжуулагчдад өнөөдөр хүндэтгэл үзүүлж, хүлээн авалт хийх үеэр энэхүү шагналыг гардуулсан байна.

Цэцэрлэгийн хоолны зардлын нэмэгдэл болох 1000₮-ийг эцэг, эхээс гаргана

Хичээлийн шинэ жилийн бэлтгэл ажилтай холбоотойгоор Боловсролын сайд П.Наранбаяр мэдээлэл хийлээ.

Тэрбээр, Цэцэрлэгийн хүүхдийн хоолны түүхий эдийн зардлыг 1000 төгрөгөөр нэмнэ. Энэ зардлыг эцэг, эх хариуцна. Ажлын 22 өдрөөр тооцож, сард 22 мянган төгрөг төлнө. Ингэснээр хүүхдийн нэг өдрийн хоолны мөнгө 2500-3000 төгрөг болж хоолондоо цадах хэмжээнд хүрнэ. Энэ ажлыг эхлээд нийслэлд хэрэгжүүлнэ.  

Зорилтот бүлгийн өрхийн хүүхдийн зардлыг төр хариуцна. Боловсролын ерөнхий хуульд цэцэрлэгийн хүүхдийн хоолны мөнгийг эцэг, эх нь хуваалцана гэсэн заалт бий. Энэ заалтыг хэрэгжүүлж буй юм. Бид энэ асуудлыг хөндсөнөөс хойш найман жилийн хугацаанд шийдэж чадахгүй явж ирсэн. Таны тушаасан өдрийн 1000 төгрөг таны хүүхдийн хоолонд л зориулагдана гэв.

Мөн сайд хэвлэлийн хурлын үеэр элсэлтийн оноог өндөрсгөх, унших бичиг хичээлийг сэргээх, хүүхдүүдийг харандаагаар бичүүлэх, сурах бичгийн агуулга, дүрэмт хувцасны загварт өөрчлөлт оруулахаар болсон талаар мөн мэдээлснийг дараах видео мэдээллээс хүлээн авна уу.

УИХ-ын 2024 оны ээлжит бус чуулганы ирц ердөө 54.8 хувь байв

УИХ-ын ээлжит бус чуулганы хуралдаан энэ пүрэв гарагт (2024.08.15) эхэллээ.

Ээлжит бус чуулганаар “Монгол Улсын Засгийн газрын 2024-2028 оны үйл ажиллагааны хөтөлбөр батлах тухай”, “Зарим Байнгын хорооны бүрэлдэхүүнд өөрчлөлт оруулах тухай”, “Дэд хорооны бүрэлдэхүүний тухай” Улсын Их Хурлын тогтоолын төслүүд болон Зарим дэд хорооны даргыг сонгох тухай асуудлыг хэлэлцсэн юм.  УИХ-ын 2024 оны ээлжит бус чуулганы ирц ердөө 54.8 хувь байв. Чуулганы талаарх дэлгэрэнгүй мэдээллийг ЭНД дарж хүлээн авна уу.

Хамтарсан Засгийн газрын гэрээнд гурван намын дарга гарын үсэг зурлаа

Улс оронд тулгамдсан асуудал, тулгарч буй сорилтыг хамтран илүү үр дүнтэйгээр шийдвэрлэхээ илэрхийлж бүрэн эрхийнхээ хугацаанд бүтээлчээр тогтвортой хамтран ажиллах зорилгоор “Хурдтай хөгжлийн төлөөх зориг” хамтарсан Засгийн газрын гэрээг гурван намын дарга нар үзэглэлээ. Хамтарсан Засгийн газрын мөрийн хөтөлбөрөөс онцлох зүйлс юу байгаа талаар ЭНД дарж хүлээн авна уу.

Жүдо, чөлөөт бөхийн холбооноос мандат авсан албаны хүмүүсийн нэрсийг зарлав

Өнгөрсөн долоо хоногт Парисын олимп өндөрлөж чухам ямар хүмүүс мандат авч явсан талаарх мэдээлэл олны анхаарлыг татав. Жишээ нь "Парис-2024" олимпын наадамд чөлөөт бөхийн төрлөөр есөн тамирчин оролцсон,  мандат авсан бүрэлдэхүүнд есөн дасгалжуулагч, дэмжих багийн 3 хүн нийт 12 хүн ажилласан байна. Энэ талаар МҮОХ-ноос мэдэгдэл гаргасныг ЭНД дарж хүлээн авна уу.

“Нүүдэлчин” дэлхийн соёлын фестиваль болж байна

“Нүүдэлчин” дэлхийн соёлын фестивалийг наймдугаар сарын 16-18-ны өдрүүдэд Улаанбаатар хотын Налайх дүүргийн 3-р хорооны нутаг дэвсгэрт орших “Тайж хайрханы бэл” хэмээх байгалийн үзэсгэлэнт газарт энэ баасан гарагт эхэллээ.

Энэ долоо хоногт дуустал үргэлжлэх наадмын нэгдсэн хөтөлбөрийг ЭНД дарж хүлээн авна уу.

ДЭЛХИЙН МЭДЭЭ

Украины талаас орос иргэдийг нүүлгэн шилжүүлэх хүмүүнлэгийн коридор нээнэ гэв

Украины цэргүүд ОХУ-ын Курск мужид нэвтрэн цэргийн үйл ажиллагааг үргэлжлүүлж буй. Тэд одоогийн байдлаар 1000 гаруй км.кв газар нутгийг хяналтдаа аваад байна.

Оросын эрх баригчид тус бүс нутгаас 120 мянга гаруй иргэнийг нүүлгэн шилжүүлсэн. Украины Шадар сайдын хэлснээр тэдний талаас иргэдийг нүүлгэн шилжүүлэх хүмүүнлэгийн коридор нээх аж. Дайны хоёр жил хагасын хугацаанд Украины талаас ОХУ-ын нутаг дэвсгэрт ийм өргөн хэмжээний довтолгоо хийж буй анхны тохиолдол болж байгаа юм.Украины талаас ОХУ руу 117 нисгэгчгүй онгоц буюу дрон харвасан бөгөөд Оросын цэргүүд тэдгээрийг унагаснаа мэдэгдсэн.

Украины Ерөнхийлөгч Володимир Зеленський "Бид Курск мужийн нутаг дэвсгэрт амжилттай урагшилсаар байна" хэмээн Телеграм хуудсаараа дамжуулан мэдэгджээ. Түүнчлэн цэргийн ажиллагааны үеэр Украинд олзлогдсон орос цэргүүдийг Украины цэргүүдээр солих боломжтойг дурдсан байна.

Японы Ерөнхий сайд Фүмио Кишида огцрохоо мэдэгдлээ

Парисын олимпын СОНИН ХАЧИН ба СОДОН ТАМИРЧИД

Парис-2024 олимпын наадам амжилттай болж өндөрлөлөө. Энэ удаагийн наадмын үеэр болсон онцлох үйл явдал, тамирчдын талаар товч мэдээллийг хүргэе.

Догь мэргэн буучид, этгээд хөдөлгөөнтэй чөлөөт бүжигчин, эгдүүтэй тамирчин охины үйлдэл, эргэн тайзнаа гарсан Селион Дион, хос тамирчдын баярт мөчөө хуваалцаж буй сэтгэл хөдөлгөм агшин гээд энэ удаагийн наадмаас онцлох үйл явдал, сонирхолтой тамирчдын талаарх мэдээллийг бэлтгэн хүргэснийг ЭНД дарж хүлээн авна уу.