Таван толгой дахь зэвсэгт хүчний сургалтын төвд энхийг дэмжих ‘’Хааны эрэлд-2024’’ олон улсын сургуулилалт өчигдөр дууслаа.

Сургалтын төв хүртэлх замд овоо болон эргэлт дээр зогсож буй цэргүүд бидэнтэй ёсолж байв. Удалгүй зорьсон газраа хүрэхэд бороо ч намдлаа. Төрийн хүндэт харуулууд жагсан, Батлан хамгаалахын сайд С.Бямбацогтод хүндэтгэл үзүүлж, Монгол Улсын төрийн дууллыг эгшиглүүлсэн юм.

Талбайд жагсаж буй орон орны эр цэргүүдийг харахад дэлхийн энх тайвны төлөө амиа өргөхөөс үл буцах мэт харагдана. Батлан хамгаалахын сайд С.Бямбацогт ”Хааны эрэлд” олон улсын сургуулилалтыг амжилттай дуусгасан нийт бие бүрэлдэхүүнд баяр хүргэж,  үг хэлэв. 

“Өнөө цагт дэлхий нийтийг хамарсан амар амгаланг тогтоох нь нэг үндэстэн, нэг улс орны биш нийт хүн төрөлхтөн, улс бүрийн хүчин чармайлтыг шаардана. Дэлхий даяар даяаршил хурдацтай явагдаж байгаагийн хэрээр нэг улс дангаар оршин тогтнох боломжгүй болж, хүн төрөлхтөн бүхэлдээ нэг зам дээр алхаж байна. Нэг улсын аюулгүй байдал, тусгаар тогтнол ганхахад дэлхийн энх тайван ганхдаг гэдгийг бид саяхан болсон дайн, мөргөлдөөнүүдээс харж  болно” гэв.

Дараа нь хээрийн сургуулилалтыг амжилттай төгссөн салаан дарга, үндэсний ахлах төлөөлөгч нарт эртний Монгол хуяг дуулга өмссөн цэргийн хүрэл баримал, дурсгалын аяга,  гэрчилгээг гардууллаа.

"Хааны эрэлд-2024"-д оролцсон цэргийн салааны ёслолын жагсаалаар төрийн хүндэт харуулууд алхсан нь сүр жавхлантай харагдана. Улсын сүр цэрэгтээ, цэргийн сүр жагсаалдаа гэдэг. Цэргийн жагсаалаас улс бүрийн сүр хүч, соёлын онцлог алхаа бүрээс нь мэдрэгдэнэ.

Зарим цэргийн жагсаалын алхаа  нэгэн жигд, нэг хүн шиг бол зарим нь бага зэрэг чөлөөтэй алхаж харагдана. Хаалтын ажиллагаа үүгээр өндөрлөж, талбай дээрх уур амьсгал өөрчлөгдөж эхлэхийг бид анзаарав. Талбай эр цэргүүдээр биш анд нөхөд, хамтрагчид, ахан дүүсээр дүүрчээ. Тэд дурсгалын зураг татуулж, салах ёс хийцгээв.

Батлан хамгаалахын сайд С.Бямбацогт "Энэ ажиллагаа цэрэг, цэргийн албан хаагчаа бэлтгэх  үр дүнтэй сургалт болж чаддаг. Үүнийг дагаад жилээс жилд оролцох улсын тоо нэмэгдсэн. Энэ жил 23 улсын 1000 гаруй цэргийн алба хаагч оролцсон. ‘’Хааны эрэлд’’ олон улсын сургуулилалт  олон улсад хүлээн зөвшөөрөгдсөн. 

Дэлхийн энхийг сахиулах ажиллагаанд Монгол Улс оролцохдоо  албан хаагчдаа илгээдэг. Энэ жил 800 гаруй албан хаагч гадаадын орнуудад энхийг сахиулах ажиллагаанд үүрэг гүйцэтгэлээ. Тэд бие бялдар, ур чадварын хувьд сайн, цаг уурын өөр, өөр нөхцөлд үүрэг гүйцэтгэх чадвартай, мэдлэгтэй  байх ёстой. Хээрийн сургуулилалтад оролцсоноор байгаль цаг уурын ямар нөхцөлд, яаж үүрэг гүйцэтгэх талаар харилцан туршлага солилцлоо’’ гэв.

БХЯ-ны Энхийг дэмжих, цэргийн хамтын ажиллaгааны хэлтсийн дарга Д.Мягмаржав "НҮБ-ын энхийг сахиулах ажиллагаанд үүрэг гүйцэтгэх бие бүрэлдэхүүний чадавхыг нэмэгдүүлэх нь энэ сургалтын зорилго. Японы өөрийгөө хамгаалах нисэх хүчинтэй хамтарсан агаарын нисэх хүчний ажиллагаанд шархдагсдыг татан гаргах үеийн нисдэг тэрэг буух талбайг хэрхэн бэлтгэх, зохион байгуулах, газарт үүрэг гүйцэтгэж байгаа цэргийн алба хаагчтай яаж холбоо тогтоох зэрэг дадлагыг анх удаа зохион байгууллаа.

Мөн энэ сургалтад НҮБ-ын Өмнөд Суданд явуулж байгаа энхийг сахиулах ажиллагаанд үүрэг гүйцэтгэх дараагийн цэргийн бие бүрэлдэхүүнийг хамруулсан. Энэ нь ажиллагааны өмнөх бэлтгэлийн нэг хэсэг’’ гэсэн юм.

Оролцогч н.Мөнхбаяр "Би энэ сургалтад анх удаагаа хамрагдлаа. Олон орны цэргээс арвин их туршлага хуримтлуулж, цэрэг хүнийхээ хувьд ур чадвараа нэг шатаар дээшлүүлсэн, үр дүнтэй сургалт боллоо. Ажиглаж байхад БНХАУ-ын бие бүрэлдэхүүн, салааны цэрэгжилт, жагсаал, биеэ авч явж байгаа байдал их сайн юм’’ хэмээв.

Оролцогч н.Ууганцэцэг "Цэргийн хүний хувьд үүрэг гүйцэтгэж байхад хүйсийн ялгаа гарах ёсгүй гэж боддог. Өгсөн үүрэг даалгаврыг эрэгтэй цэргийн албан хаагчтай адилхан л гүйцэтгэх ёстой. Бид ижилхэн хувцас өмсөж, нэг тушаал дор захирагдаж байгаа бол хүйсийн ялгаа гаргах ёсгүй, бүх зүйл эрх тэгш, жигд үйлчилдэг. Бид энэ сургалтаар  11  хичээлд хамрагдсан. Олон орны соёл, туршлагаас суралцаж, чадвараа дээшлүүлсэндээ баяртай байна’’ хэмээн сэтгэгдлээ хуваалцсан юм.

Л.Оюунчимэг