Парис-2024 зуны олимпын жүдо бөхийн тэмцээнд Монгол Улсаас медаль хүртсэн тамирчин нь Жүдо бөхийн үндэсний шигшээ багийн тамирчин, ОУХМ Бавуудоржийн Баасанхүү. Тэрбээр олимпын наадмын эхний өдөр -48 кг жинд барилдаж, Парисын тэнгэрт Монгол Улсынхаа далбааг мандуулсан билээ. 

Парис-2024 олимпын наадмын жүдо бөхийн тэмцээний дараа Олон улсын жүдо бөхийн холбооноос дэлхийн чансааг шинэчлэн тогтоосон  бөгөөд 2024 оны наймдугаар сарын 5-ны өдөр гаргасан шинэ чансаагаар эмэгтэй -48 кг жинг Монгол Улсын тамирчин, олимпын наадмын мөнгөн медальт Б.Баасанхүү тэргүүлсэн билээ. Тэрбээр 7286 оноо цуглуулж, жингийнхээ бүх тамирчдыг тэргүүлжээ.

Олимпын мөнгөн медальт, жиндээ дэлхийн чансааг тэргүүлэгч Б.Баасанхүүд баяр хүргэж, Монгол  Улсын аж ахуйн нэгжүүд болон хувь хүмүүс өөр өөрийн шагналаар амжилтыг нь мялааж байна. Тухайлбал, 

• “Макс Групп”-ийн Ерөнхийлөгч Д.Ганбаатар тэргүүтэй удирдлагууд хүлээн авч /2024.08.23/, 50 мянган ам.доллар бэлэглэв.  
• Тод манлай уяач П.Энхмөнх өөрийн уяанд хүлээн авч, азарга адуу бэлэглэлээ. 
• МҮОХ-ны ерөнхийлөгч Б.Баттүшиг Б.Баасанхүүг дасгалжуулагч М.Бундмаагийн хамт хүлээн авч, МҮОХ-ны мөнгөн түнш “Скайтел ХХК”, Имарт (Скай Хайпермаркет ХХК) болон “Баттүшиг Цэлмүүн сан”-гийн төлөөллийн хамт Б.Баасанхүүд 100 сая төгрөг, "Скайтел" компаниас шинээр гаргасан “6999.....”, “6969....” алтан дугаарыг “Лос Анжелес 2028” зуны олимпын наадам хүртэлх хугацаанд үнэ төлбөргүй ашиглах эрхээр шагнав.
• Төрөлх нутаг Хөвсгөл аймгийнх нь удирдлагууд нутагтаа хүлээн авч, аймгийн төв дэх "Мөрөн вилла" хотхонд хоёр өрөө байр бэлэглэснээ дуулгаж, батламж гардуулав.
• Монгол Улсын Засгийн газраас гурван өрөө байр бэлэглэснээ зарлаж, батламжийг Ерөнхий сайд Л.Оюун-Эрдэнэ гардууллаа. 

Төрөөс сар бүр 3 сая төгрөгийн урамшуулал олгоно

2012 онд Ерөнхийлөгч Ц.Элбэгдорж зарлиг гаргаж, Үе үеийн Олимпын наадам /Зуны олимп, өвлийн олимп, пара олимп /, Дэлхийн аварга шалгаруулах тэмцээнээс олимпийн спортын зай, жинд медаль хүртсэн Монгол Улсын иргэнд насан туршид нь сар бүр урамшуулал олгох тухай чиглэл өгсөн. Тамирчдад сар бүр олгох урамшууллын хэмжээг дараах байдлаар тогтоожээ. Үүнд:

1. Олимпийн наадмаас алтан медаль хүртсэн тамирчинд 4 сая төгрөг

2. Олимпийн наадмаас мөнгөн медаль хүртсэн тамирчинд 3 сая төгрөг

3. Олимпийн наадмаас хүрэл медаль хүртсэн тамирчинд 2 сая төгрөг

4. Дэлхийн аварга шалгаруулах тэмцээнээс олимпийн спортын зай, жинд алтан медаль хүртсэн тамирчинд 2 сая төгрөгийг насан туршид олгохоор тусгасан нь хүчин төгөлдөр мөрдөгдөж байна.  

Засгийн газрын уг тогтоолын дагуу олимпын наадмын мөнгөн медальт Б.Баасанхүүд насан туршид нь  улсаас сар бүр 3 сая төгрөг, үүн дээр энэ жил Дэлхийн аварга болсон учир 2 сая, нийт 5 сая төгрөгийн урамшуулал олгох юм. Мөн Засгийн газраас нэг удаагийн мөнгөн урамшуулал олгодог.