Их жанжин Дамдины Сүхбаатарын мэндэлсний 133 жилийн ой өнөөдөр тохиож байна. Жанжин Д.Сүхбаатар 1893 оны 2-р сарын 2-ны өдөр Амгаланбаатар хотод ядуу ард Дамдины гэр бүлд төржээ. Багаасаа хүнд бэрх амьдралыг туулж, 15 настайдаа бичиг үсэг сурч эхэлсэн бөгөөд 1911 онд цэргийн албанд орж, Пулемёт сумангийн даргаар ажиллаж, эх орноо гаднын түрэмгийллээс чөлөөлөх дайнд оролцож, Баатар цолоор шагнагдсан.

Сүхбаатар 1921 онд Ардын хувьсгалыг удирдан, Монгол Улсын тусгаар тогтнолын төлөө тууштай тэмцэж, Ардын засгийн газрын Цэргийн яамны сайд, бүх цэргийн жанжин болсон. Тэрбээр Зөвлөлтийн удирдагч В.И.Ленинтэй уулзаж, хоёр улсын хооронд найрамдлын гэрээ байгуулсан.



1913 онд Н.Янжмаатай гэр бүл болон өрх тусгаарлан Хужирбуланд суужээ. Тэрбээр 1923 оны 2-р сарын 20-нд 30 настайдаа таалал төгссөн. Түүний нас барсан шалтгаан нь тодорхойгүй бөгөөд зарим эх сурвалжид хорлогдсон гэж үздэг байна.

Дамдины Сүхбаатар нь Монголын ард түмний дунд өндөр нэр хүндтэй, ардын хувьсгалын анхны удирдагчдын нэг бөгөөд түүний гавьяаг үнэлж, 1922 онд ЗСБНХОУ-ын Улаан тугийн одонгоор, Монгол Улсын Зоригт баатар бэйс цолоор шагнасан. Түүний нэрээр олон байгууллага, гудамж, талбайг нэрлэж, түүний дурсгалыг мөнхжүүлжээ.