Монгол Улсын Засгийн газар 2025 онд уул уурхайн бүтээгдэхүүний экспортыг нэмэгдүүлэх бодлогын хүрээнд хил дээр хуримтлагдсан нүүрсний овоолгыг бууруулах, тээвэрлэлтийг оновчтой зохион байгуулах, хилийн боомтын нэвтрэх чадварыг нэмэгдүүлэх зэрэг цогц арга хэмжээ авч хэрэгжүүлсэн.

Ийн гадаад зах зээл дэх түүхий эдийн үнийн өсөлт нь экспортын орлогыг нэмэгдүүлэхэд чухал нөлөө үзүүлжээ.

Түүнчлэн “Монголын хөрөнгийн бирж” ХК нь нүүрс экспортлогч компаниуд, төмрийн хүдэр баяжуулах, боловсруулах үйлдвэрүүдийн төлөөлөл, худалдан авагчидтай уулзалт хийж, биржээр бүтээгдэхүүнээ арилжаалах, худалдан авах боломж, давуу талуудыг сурталчлан таниулах арга хэмжээг удаа дараа зохион байгуулсны үр дүнд дараах өсөлтүүдийг үзүүлээд байна.

Үүнд:  Уул уурхайн бүтээгдэхүүний биржээр 2025 онд нийт 937 удаагийн цахим дуудлага арилжаа зохион байгуулжээ.

2025 оны 11 дүгээр сарын 24-ний өдрийн байдлаар нийт 23.4 сая тонн уул уурхайн бүтээгдэхүүнийг 5.95 их наяд төгрөгөөр арилжаалсан байна.  

Үүнээс эхний хагас жилд 5.33 сая тонн уул уурхайн бүтээгдэхүүнийг 1.4 их наяд төгрөгөөр арилжаалж, дуудлага арилжааны үнийн өсөлтөөс худалдагч компаниуд 21.97 тэрбум төгрөгийн нэмэлт орлого олжээ. 2025 оны хоёрдугаар хагас жилд буюу 2025.07.01-2025.11.24-ний өдрийн хооронд нийт 18.1 сая тонн УУБ-ийг 4.55 их наяд төгрөгөөр арилжаалж, дуудлага арилжааны үнийн өсөлтөөс худалдагч компаниуд 270.1 тэрбум төгрөгийн нэмэлт орлого олсон.

Энэ нь 2025 оны эхний хагастай харьцуулахад биржээр арилжаалагдсан бүтээгдэхүүний тоо хэмжээ 239%, үнийн дүн 226 хувиар тус тус өссөн үзүүлэлттэй байна.

Эх сурвалж: Монголын Хөрөнгийн Бирж