Мобиком групп жил бүр хамтрагчид, түншүүдээ урьж, шинэ бүтээгдэхүүн үйлчилгээгээ танилцуулдаг уламжлалтай. Энэ зорилгоор Mobiconnect2025  үйл ажиллагааг энэ сарын 3-нд Аса арена-д зохион байгуулж, байгууллагын хэрэглэгчдэд зориулсан шинэ шийдлүүд, дижитал инновацууд, хамтын ажиллагааны боломжуудыг танилцууллаа. 

MONPAY 2.1 САЯ ХЭРЭГЛЭГЧТЭЙ, СУПЕР АПЛЛИКЭЙШН БОЛЖЭЭ   

 
“Мобифинанс” ББСБ-ын гүйцэтгэх захирал М.Бүдбазар эхний илтгэлийг тавьж, Monpay 2.1 сая хэрэглэгчтэй, супер аплликэйшн болсон гэв. Цахим төлбөр тооцооны шинэ үеийг эхлүүлсэн Monpay-д нийт 284 сая төгрөгийн хандив цуглажээ. Энэ аппликэйшнийг хэрэглэгчид хандивт нэгдэж, нийгэмдээ багагүй хувь нэмэр оруулсан байна. 

Мөн НӨАТ-ын системтэй холбогдсон тул иргэдийн цахим шуудан руу НӨАТ-ын баримтыг илгээдэг. Ингэснээр цаас хэмнэж, 32 мянган тонн хүлэмжийн хийг бууруулжээ.     

Манай улсын 2.2 сая иргэн жилд 6 их наяд төгрөгийн төлбөр тооцоо, гүйлгээг цахимаар хийжээ. Цаашид энэ тоо 10 их наяд төгрөгт хүрэх төлөвтэй байгааг М.Бүдбазар захирал танилцууллаа. Иргэд дунджаар сард нэг удаа цахим худалдаа хийдэг, гар утастай иргэдийн 90 хувь нь ухаалаг гар утастай болжээ. 
 
Энэ аппликэйшнд MonPay Awww онлайн дэлгүүр бий. Та Мобикомд борлуулж буй утас, дагалдах хэрэгслүүд болон бусад барааг  авах боломжтой. 50 мянган төгрөгөөс дээш үнэтэй барааг хуваан, урьдчилгаагүй, шимтгэлгүй, хүүгүй зээлээр худалдан авна.  

Мөн чат системээр дэлгүүр, хэрэглэгч шууд харилцаж, бүтээгдэхүүний талаар мэдээллээ өгч авалцах боломжтой.  

SONSY ГЭЖ СОНССОН УУ?  

Энэ аплликэйшнийг өнгөрсөн наймдугаар сарын 15-нд нээсэн. Хөгжмийн шинэ стрийминг үйлчилгээ юм. Бидний амьдарлын баяр хөөртэй мөч бүрд хөгжим эгшиглэж байдаг. Иймд энэ апп-ийг бүтээгчид хөгжмийн салбарт 20 жил ажилласан туршлагадаа үндэслэн, оюуны өмчийг дээдэлсэн, Монголын хамгийн баялаг сантай платформ хөгжүүлжээ.  

Та 1300 уран бүтээлчийн 20 мянган дуунаас сонгон сонсож болно.  Apple music, Spotify гэх мэт  гаднын үйлчилгээ ашигладаг бол хаанаас ч, хэзээ ч сонсож болох, шинэ стриймингийг туршаад үзээрэй.  

Та дуртай дуунуудаараа плэйлист үүсгээд, интернэтгүй орчинд ч сонсож болно. Мөн кофе шопууд, зоогийн газрууд, гоо сайхны газар гэх мэт үйлчилгээ эрхлэгчид албан ёсны зөвшөөрөлтэй хөгжмүүдийг Sonsy багийнхнаас авч болно гэж "Монгол контент" ХХК-ийн Бизнес, үйл ажиллагааны албаны захирал Ц.Төгөлдөр онцлов.  

Дуу хөгжимд дурлагчид Sonsy апп-ийг татах бол энд дарна уу.  

ДАРАА ТӨЛБӨРТ, НЭГ САЯ ХЭРЭГЛЭГЧИД АМЬДРАЛЫН ДААТГАЛЫН ҮЙЛЧИЛГЭЭГ БЭЛЭГЛЭЖЭЭ 

Манай улс хорт хавдрын өвчлөл, нас баралтаар бүс нутагтаа төдийгүй дэлхийд эхний байранд жагсдаг. Тэр хавдраар өвджээ, энэ маань хавдраар өнгөрсөн гэх мэдээ үе үе дуулддаг. Энэ нь зөвхөн эрүүл мэндийн салбарынхны л анхаарах асуудал биш тул Мобиком групп амьдралын даатгалын цоо шинэ бүтээгдэхүүнтэй болж, Mobilife гэж нэрлэжээ.  

Тус группийн Стратегийн асуудал хариуцсан дэд захирал Б.Үнэнбат “Амьдралын даатгалын үйлчлгээ үзүүлэх гурав дахь тусгай зөвшөөрлийг бид авлаа. Энэ үйлчилгээ манай улсын ДНБ-ий ердөө 0.6 хувийг бүрдүүлдэг. Нэвтрэлт дэлхийн дунджаас арав дахин бага байна. Бид Мобиком группийн дараа төлбөрт хэрэглэгчдэдээ 1-4 сая төгрөгийн хамгаалалт бүхий амьдралын даатгалын үйлчилгээг үнэ төлбөргүй өгч байна.

Нийт нэг сая иргэн энэ үйлчилгээг авахаас одоогоор 30 мянган хүн авсан. Бид эхний ээлжид 50 тэрбум төгрөгийн хамгаалалт бүхий даатгалыг иргэдэд санал болгоно. Цаашид энэ дүнг хоёр их наяд төгрөгт хүргэнэ” гэв.  

TELCO TO TECHCO 

“Мобинэт” ХХК-ийн гүйцэтгэх захирал Ц.Идэрмөнх Мобиком группийн алсын хараа, эрхэм  зорилго өөрчлөгдсөнийг танилцуулав. Манай улсын харилцаа холбооны ууган компани болох Мобиком цаашид технологийн салбарт илүү төвлөрнө. Энэ бодлогоо TELCO TO TECHCO гэж товчлон нэрлэжээ. Гэхдээ энэ зорилгод хүрэхийн тулд ганцаараа биш хамтрагчид, түншүүдтэй хамтран ажиллах нь гарцаагүй. 

Манай улсад хэвлэл  мэдээллийн хэрэгслүүд дундаас ТВ хамгийн их хүртээмжтэй суваг хэвээр байна. Айл бүр шахуу  телевизтэй, дэлгэцийн өмнө гэр бүлээрээ сууж, хооллодог, кино үздэг. Гэхдээ маш олон сувгууд нээгдэж, төрөлжсөн контентууд санал болгож эхэллээ.  

Иргэдийн хамгийн их цаг зарцуулдаг медиа нь ТВ хэвээр байгаа тул ААН-үүд ч зар сурталчилгаагаа телевизээр цацуулах хүсэлтэй байдаг. Тэгвэл аль сувгийг ямар иргэн, хэзээ хамгийн их үзэв гэсэн өгөгдлийг цуглуулжээ.  

VOO-гийн үзэгчдийн өгөгдлийг цуглуулан,  дүн шинжилгээ хийснээр маркетингийн багийн ажлыг ихээхэн хөнгөвчилнө. Энэ үйлчилгээг WatchWise гэж нэрлэсэн байна.                 

“Мобинет” ХХК-ийн Хэрэглэгчийн бизнесийн албаны  захирал Э.Янжинлхам “Клауд технологиор телевизийн нэвтрүүлгүүдийн үзэлтийг оновчлох боломжтой. Манай улсад жижиг компаниуд жилд 10 сая, том ААН-үүд 20 хүртэл сая төгрөгийн телевизийн рекламанд төлдөг. Гэхдээ хамгийн өндөр үнэтэй сувгууд хамгийн сайн үзэлттэй биш байна” гэсэн юм.  

Мобиком группийн танилцуулсан дараагийн үйлчилгээ нь клауд үйлчилгээ. “Мобиком нэтворкс” компанийн захирал, доктор Б.Отгончимэг  “Хиймэл оюун ухаан хөгжиж, байгууллагууд их өгөгдөлтэй болов. Энэ өгөгдлийг хэрхэн хадгалах, яаж боловсруулж хөрөнгө оруулалтын өгөөжөө өсгөж, бүтээмжээ нэмэх вэ? Эдгээрт болон дижитал шилжилтэд ч клауд үйчиллгээ тусална. Системийн найдвартай байдлыг хангах, сар бүр хэрэглэснээрээ төлөх, богино хугацаанд өргөтгөх боломжтой” гэв.  

GEOPRO ӨГӨГДӨЛД СУУРИЛСАН ХӨГЖИЛ РҮҮ ХӨТӨЛНӨ  

Маркетингийн газрын Бизнес хөгжлийн албаны захирал Б.Энэрэл GEOPRO хэмээх шинэ үйлчилгээг танилцуулав. Өгөгдөлд суурилсан хөгжил рүү хөтлөх энэ үйлчилгээг хот төлөвлөлт, нийтийн тээврийн шийдвэр гаргалтад ашиглах боломжтой.  

Учир нь хүн амын хөдөлгөөний мэдээлэл буюу их өгөгдлийг танд гаргаж өгнө. Мобиком группийн хэрэглэгчдийн өдөр бүр хийдэг дуудлага, тэдгээрийг хүлээн авсан болон мессеж илгээсэн гэх мэт 46 сая өгөгдлийг цуглуулдаг байна. Өгөгдлийн чанар, хэрэглэгчийн аюулгүй байдалд анхаарч, өгөгдлийг цуглуулсны дараа танигдахгүй болгодог аж.  

Орон даяар байршуулсан дата баазуудаас мэдээлэл хүлээн авч, иргэд ямар зорилгоор, хаашаа, ямар тээврийн хэрэгслээр зорчсоныг мэдэх боломжтой. Эдгээр мэдээллийг өдөр бүр  шинэчилдэг байна. Жишээ нь Баянбүрдийн  тойргоос Сансрын И- март хүртэлх газрыг сонгон, хэчнээн хүн нэг өдөрт зорчсон тоог гаргажжээ. Нийт 163 мянган хүн зорчсон, 57 хувь нь эмэгтэйчүүд, насны бүлгээр нь харвал 29 хүртэл насныхан түлхүү зорчжээ. И-Март орчимд хамгийн олон хүн цугларсан байна. 

Хэрэв та бизнесээ өргөжүүлж, шинэ салбараа нээх гэж байгаа бол, хаана нээхээ шийдээгүй, хотын аль цэгт таны үйлчилгээг авах иргэд илүү цуглардгийг GEOPRO танд төвөггүй хэлж өгөх нь ээ. 

МАНАЙ УЛСЫН ИРГЭД ӨДӨРТ ДУНДЖААР 20 АППЛИКЭНШ АШИГЛАДАГ  

Мобиком группийн Мэдээллийн технологийн инженерингийн албаны захирал Ж.Магваншийрэв сонирхолтой баримтуудыг хуваалцав. Манай улсад иргэд  дунджаар 20 аппликэнш ашигладаг, бидний интернэт хэрэглээ дэлхийн дунджаас 144 хувь илүү болжээ.  

Санхүүгийн төлбөр тооцооны гэх мэт зарим аппликэйшн OTP хэмээх баталгаажуулах кодыг хэрэглэгч рүү илгээн, та мөн болохыг баталгаажуулдаг. Аюулгүй байдлыг хангах зорилготой ч заримдаа OTP код ирдэггүй,  иргэд хүлээдэг, ахмад настнуудад төвөгтэй байдаг байна.  

Мөн хакерууд замаас нь энэ кодыг олж авах эрсдэл бий. Иймд таван жилийн дараа OTP үйлчилгээ хэрэглээнээс гарах төлөвтэй байгаа тул Mobi open gateway үйлчилгээг танилцуулав.   

Мобиком групп саяхан л харилцаа холбооны салбараас тэлж, технологид төвлөрнө гэж зарласан бол  хэдийнэ технологийн компани болсноо харууллаа. Тэд WATCH WISE, GEOPRO гэх мэт  олон шинэ үйлчилгээг зах зээлд амжилттай нэвтрүүлжээ.   

Гэрэл зургийг Г.Өнөболд