Шатахууны цаг үеийн асуудлаар Аж үйлдвэр, эрдэс баялгийн яамны Газрын тосны бодлогыг газрын дарга Ч.Хишигбат өнөөдөр мэдээлэл хийлээ.

Тэрээр " Шатахуун болон дизель түлшний хэрэглээ огцом нэмэгдсэн байна. Үүнтэй холбоотой нийлүүлэлтийн хомсдол үүссэн.Техникийн хүчин чадал, хүргэлт, хуваарилалт зэргийг аж ахуйн нэгжүүд зохион байгуулах шаардлагатай байна. 

Сүүлийн дөрвөн жилд 50 тусгай зөвшөөрөлтэй аж ахуй нэгж байсан бол одоо 180 болсон.  Гэтэл нөөцлөх савтай аж ахуй нэгжийн тоо 20 гаруй байна. Хомсдол үүсэхэд эд нартайгаа л хариуцлага ярьдаг.

Шатахуун хомсдолтой үед жижиглэнгээр үүрэг хариуцлага хүлээж байгаа шатахуун түгээх станцтай 20 гаруй ААН-үүдэд ачаалал үүсдэг. 

150 орчим тусгай зөвшөөрөлтэй бүтээгдэхүүн импортолдог аж ахуйн нэгжүүд оруулж ирсэн бүтээгдэхүүнээ агуулахад хадгалахгүйгээр шууд уурхай руу явуулдаг бизнестэй болчихсон. Энэ нь ОХУ-аас шатахуун олдохгүй, тасралттай байгаа энэ үед жижиглэнгээр худалдаалдаг аж ахуйн нэгжүүдэд ачаалал үүсгэж байна. Нөгөө хэд нь байгаа бүтээгдэхүүнээ оруулж ирж зараад бүтээгдэхүүнийхээ ашгийг аваад, хадгалах савтай болох, нөөцлөх сонирхолгүй байдаг.

Энэ нь эргээд хомсдол, тасалдал үүсэх нөхцөл болж байна. Иймд чадвартай, олон жил үйл ажиллагаа явуулсан бизнес эрхлэгчдэд зээл олгох шаардлагатай байна гэсэн дүгнэлтэд хүрээд сая Стратегийн ач холбогдол бүхий бараа бүтээгдэхүүний хангамж, нийлүүлэлтийг дэмжих тухай хуулийг батлуулсан.

Энэ хууль гурван зорилготой. Нэгдүгээрт, тасалдал, хомсдол гэж юуг хэлэх, энэ үед Засгийн газар ямар зохицуулалт хийх шаардлагатайг тодорхой болгож оруулсан.

Хоёрдугаарт, аж ахуйн нэгжүүдэд агуулах, сав барихад Засгийн газраас ямар дэмжлэг үзүүлж болох, банкны нөхцөл, шаардлагыг хангаж чадахгүй ААН-үүдэд ямар арга хэмжээ авч болох талаар зохицуулж өгөх, хямд үнээр бараа худалдан авч, олон сараар нөөцлөх боломж нь байвал Засгийн газар дэмжиж, 17 орчим хувийн хүүтэй зээл олгох бөгөөд банкны шаардлагыг арай сулруулах талаар энэ хуулийн төсөлд тусгасан.

Хуульд хөнгөлөлттэй зээл олгох, аж ахуйн нэгжүүдэд давуу эрх үүсгэх заалт байхгүй. Иймд олон жил үйл ажиллагаа явуулсан ААН-үүдийг агуулах, нөөцлөх сав барихад нь төрөөс дэмжих шаардлагатай гэсэн дүгнэлтэд хүрлээ.

Хууль тусгай зөвшөөрөлтэй бүх байгууллагад нээлттэй" гэв.

АШЭБ-ийн сайд Г.Дамдинням: Шатахууны асуудал бол нэг өдөр гэнэт үүссэн зүйл биш. 35 жил аргацааж явсаар хуримтлагдсан асуудал. Энэ удаагийн байдал ирэх хоёр өдөрт намжихаар байна.

Цаашид:

• Газрын тос боловсруулах үйлдвэрээ барьж дуусгах
• Үйлдвэрийн түүхий эдээ бэлдэх
• Нөөцлөх сав их хэмжээгээр барьж байгуулах
• Нөөцийн хяналтын улсын нэгдсэн системтэй болох зэрэг ажлууд хийгдэх ёстой.

Дээрх ажлуудад бодлого, шийдэл гаргаад ажиллаж байна" гэв.