Ашигт малтмал, газрын тосны газар, БНСУ-ын КОЙКА болон KGS байгууллагууд хамтран "Шатдаг хийн аюулгүй байдлыг хангах" төслийг 2025-2027 онд хэрэгжүүлнэ. АМГТГ-ын дарга П.Баянбаатар төслийн багийнхантай уулзаж, ажлын төлөвлөгөөгөө хэлэлцлээ.

Гэр хорооллын халаалтыг хийн түлшээр шийдэх хэрэгцээ нэмэгдэж байна. Тиймээс энэ төслөөр хийн хадгалалт, тээвэрлэлт, ашиглалтын аюулгүй байдлыг олон улсын стандартад нийцүүлэх юм. Мөн эрх зүйн орчныг боловсронгуй болгоход голлон анхаарна.

Төслийн хүрээнд инженер, техникийн ажилчдыг сургаж чадавхжуулна. Үүний зэрэгцээ иргэдэд хийн түлшний аюулгүй ажиллагааны зааварчилгааг тогтмол хүргэхээр төлөвлөжээ. Хоёр тал бэлтгэл ажлыг богино хугацаанд хангаж, үр дүнтэй ажиллахаар тохиролцсон аж.

Эх сурвалж: Ашигт малтмал, газрын тосны газар